 放大圖片
今季原本喺谷草贏得三W嘅「活力歡騰」，由於其中一場谷草千八米被驗出有違禁藥而被取消資格，搞到呢隻本來有機會贏百萬挑戰賽嘅馬，喺取消咗一場谷草頭馬後，現時評分跌到第十位。好彩呢頭被取消頭馬資格，嗰頭又贏番場三級賽精英碟，盃王大摩果真有佢一套，馬主想嬲都嬲唔落。講番跑馬地百萬挑戰賽，呢次夜馬最後計數，誰是王者，呢次夜馬後揭盅，現時積分咬得最緊九隻馬，目前「摯友無敵」以44.5分排首位，「喜喜寶」及「大寶藏」42分並列第二位，「有醒」40分第三位，其餘仲有五隻均有36分，齊列第五位，分別為「新妙星」、「十二門徒」、「帝聖神駒」、「振興中華」及「君子協定」。講真冠軍屬邊隻，應該不外乎頭四名之內，其中積分排第二嘅「喜喜寶」形勢最好，只要佢順利勝出，「摯友無敵」及「大寶藏」又贏唔到嘅話，冠軍寶座好大機會坐上。點解話方仔嘅「喜喜寶」呢次好有機會坐上呢個寶座，事關佢呢次跑二班一哩，同場對手冇一隻能力強過佢，只要冇乜意外，應可順利一放而回。上次「喜喜寶」首次跑谷草千八米，輸咗俾隻「聰明才智」，對手屬出戰打吡後備馬，質素當然有番咁上下，其實「喜喜寶」之所以唔夠「聰明才智」跑，該仗大摩派隻「新力鷹」同「喜喜寶」鬥燒，所以「聰明才智」才收漁人之利，呢次「喜喜寶」縮程跑番一哩，相信冇乜對手可與牠抗衡，所以呢屆百萬狀元，佢機會最高。
|
放大圖片
