文匯精選：威利大大開齋在望

放大圖片

呢個禮拜三，由於冇馬跑關係，馬房工作可以攤長嚟做，唔少倉口氣氛都冇以往咁緊張，而蘇保羅呢日，更親自掏腰包，訂咗三隻大燒豬、三隻雞及三隻鵝，下午安排喺馬房還神，只見午間有架大燒臘車，載住呢啲拜神祭品駛入馬房，由於馬房安排咗拜神關係，倉主吩咐下午提早半個鐘開工，亦即係可以早半個鐘收工，等班馬房手足可以收工後一齊還神，食吓燒豬，而呢次拜神儀式，只見「友瑩格」馬主楊毅出席，騎師方面，僅有潘頓及梁家俊，潘頓由於住喺宿舍，所以入蘇保羅馬房一啲都唔遠，只見工作人員擺晒嘢，一個電話，十餘分鐘即出現，但徒弟梁家俊則非常有心，師父吹雞拜神，佢同埋女朋友即刻由九龍屋企，揸架白色市價九十五萬日產GTR跑車入馬房戥師父高興吓，難怪師父咁錫佢。

由於呢個拜神儀式，並唔係點樣大搞，只係邀請咗一位馬主咁大把，其實，倉主目的，只係想還吓神，今季到目前成績咁好，佢經已心滿意足，不過咁，心足還心足，倉內雖然有啲馬成績今季經已超額完成，但亦有部分仲未交代，餘下賽馬日，佢希望可以替呢類未交代馬匹爭取勝利。好似呢次日賽咁，旗下唔少蘇廄參戰馬季內經已交出頭馬，所以搏呢類馬，倉主基本上冇乜壓力，再贏可以話係錦上添花，但有隻馬，倉主好想同佢贏，呢隻就係出戰三班二千二百米嘅「威利大大」。呢隻馬今季轉入蘇保羅倉，至今八戰，只得兩次上名成績，初期六仗由梁家俊騎，但始終跑唔出最佳水準，近兩仗轉手由潘頓操刀，二千米得亞軍，上場縮返跑千八米，得第七名輸兩個身位，呢隻馬全熟後性能愈長愈好，呢次跑二千二百米，可望見佢真正威力。