 放大圖片
李易達馬房今季到目前為止尚欠一場就畢業，而呢一場頭馬講難唔難，講易又唔易，點解咁講，因為距離煞科仲有一段日子，馬房根本唔擔心會贏唔到呢場頭馬，故今季要合格可以講一啲都難唔到李易達，不過，要呢場頭馬快啲來臨，又唔係李易達話想有就有，始終贏一場馬要天時地利環境配合。其實，李易達都好希望第十五場頭馬可於短期之內達到，一來可以令倉內手足唔使成日背負呢個達標包袱，壓力亦無咁大，二來馬房成績達標之後，喺日後部署馬匹搏殺，就可以更加靈活，部署上來唔使綁手綁腳。
早兩日李易達同馬房各手足私下開了一個會，時間雖然只係十餘分數，但充滿鼓勵性，首先倉主指出今季馬房一定可以取得合格頭馬數目，大派定心丸俾各手足，起碼唔使擔心散倉，而倉主為要早日達成贏足十五場合格數目，希望各員工可以為馬房多走一步，努力工作，亦立下承諾，由贏滿第十五場開始，馬房只要每多贏一場頭馬，他會從贏馬獎金之中，拿一部份分給大家。當然，所拿的獎金未必太多，但倉主亦會極力游說麾下馬主，勝出馬匹所取得的獎金，也預一部份打賞給倉內員工，據悉，這個馬房已有部份馬主加入響應。對馬房員工，倉主已作出了鼓勵，對於運氣方面，倉主亦非常在乎，閒時只見倉主向着關公細心稟告，希望未來日子能夠搏殺順利，唔會有任何阻滯。另一方面，亦祈求神靈保佑楊明綸，陣上策騎時候平平安安，因為未來日子，馬房會盡量利用這小伙子搏殺交出成績。
今次夜賽李易達共派四駒上陣，馬房消息傳來，除「炸魚薯條」一駒機會麻麻外，其餘三隻均屬牌面馬，分別為第二場「永常勝」、第三場「其樂無窮」及第八場「一見鍾情」。呢三隻馬，連日午間均見被安排到機坪踱步，講狀態均有唔錯水準。出戰第八場三班一哩之「一見鍾情」，呢隻馬比較神經質型，前次由韋達跑獲一席第二名後，原庄人馬再出卻又跑到無影，所以今次馬房用梁家俊一試，希望用吓唔同騎師改變一下，使到馬匹有新鮮感可以發揮出威力，係李廄半冷實力馬。
永常勝係時候開胡
列陣第二場嘅「永常勝」，到目前為止只曾於谷草二千二百米上過名，輸俾頭馬「尚華盛甲」個幾馬位得第二名，近兩場上陣，雖然再無三甲成績交出，其實，呢兩場唔係跑唔適合性能嘅泥地，就係轉戰田草，場地並唔啱「永常勝」發揮，今次重返上名路程，睇馬匹近期狀態依然咁靚，運氣好少少嘅話，呢場就可以替李易達畢業。
其樂無窮降班着數
至於喺三場出戰一哩嘅「其樂無窮」，係馬房另一隻叫胡畢業馬，呢隻「其樂無窮」季內經已贏過兩場，都係谷草一哩，不過呢兩場谷草一哩全屬四班賽，之後升上三班只能交出一席位置，近期馬房致力替呢隻馬減分，結果可以喺今次跑番四班賽，馬房立刻搵番季內替呢隻馬贏過兩次嘅柏寶披甲，擺明車馬搏殺，希望呢對贏馬組合再次能夠幫李廄旗開得勝。
|
放大圖片
