 放大圖片
雷神夜馬騎隻「和諧氣氛」起步整傷背脊，搞到贏完第一場之後，餘下坐騎唔能夠履行策騎任務。雖然換咗人上陣嘅雷神坐騎，依然有兩隻可以勝出，分別係鄭雨滇替工嘅「麟轉乾坤」及由蘇狄雄所騎嘅「川河猛駒」，換句說話，由雷神騎相信一樣可以贏到馬。咁樣情況下，對一開波就捧雷神騎師王嘅馬迷來講，呢次真係輸得冤枉，贏梗嘅錢，到頭來因騎師受傷，變成只作為一個獨立積分統計，即贏一場就計一場，結果呢晚俾楊明綸冷手執個熱煎堆，勝出呢個騎師王，當然事後睇呢個騎師王玩法好唔合理，不過，話又分兩頭說，規矩早定下，正所謂姜太公釣魚，願者上釣，無強逼成份。
講番雷神呢一筆，背部健康經檢查過後，無傷及筋骨，好快出番醫院，呢次唔需要報定後備騎師，證明健康一定無問題，唔會好似上次潘頓腎病事件咁，做完手術無耐即上陣，跑唔到要換人幾咁麻煩，事關呢兩位皆屬當紅騎師，一日坐騎要換人，郁一郁手，有機會十匹八匹，所以處理呢類事件，一定要小心從事。雷神健康冇問題，呢次日賽主力替大摩馬掛帥，遮打盃騎「喜蓮歡星」、沙田銀瓶揀「新力風」，兩匹牌面馬，「新力風」捧盃成數應屬最高。點解咁分析，好簡單一件事，「新力風」現負一一三磅，莫雷拉要一早申請定超兩磅騎。睇番剛剛跑完嘅夜賽，蔡約翰「鑽之友」由田泰安騎，負一一七磅跑，反觀莫雷拉騎同場一三二磅嘅「優勝」，其後換咗薛寶力跑，結果「鑽之友」如狼似虎取得第二名，證明咗雷神唔輕易騎輕磅馬，呢隻「鑽之友」，雷神明明可以從容造磅上陣，但佢偏唔騎，最終真係差兩步先至贏到對手。今次「新力風」情況與「鑽之友」唔同，雷神早已申請超兩磅披甲，由呢個動態顯示，呢場好有機會贏馬捧盃。
|
放大圖片
