獨有消息：多名利每季例贏一場

放大圖片

大摩最鍾意用邊個騎師同佢啲馬搏殺，相信好多人會答係莫雷拉，其實一直以來，大摩都好關照一位澳洲騎師，呢位仁兄就係貝湯美。好多時候，香港有一級賽事舉行，大摩同時出三幾隻實力馬，佢必定邀請貝湯美前來客串一日，雖然成績唔係咁好，但貝湯美似乎樂此不疲，而近期貝湯美亦有番應得嘅回報，就係喺獅城勇奪新航國際盃冠軍，貝湯美替大摩嘅「花月春風」取勝，蟬聯呢個錦標。大家咪忘記，呢場新航國際盃一級賽，雷神無替大摩馬披甲，而大摩亦專登唔用雷神，喺澳洲請番貝湯美嚟贏呢隻馬，呢種咁有默契嘅安排，反映咗貝湯美屬大摩倚重嘅殺手。今次貝湯美來港為大摩嘅「多名利」出戰遮打盃，當然同場之中，馬迷會同一時間留意埋雷神隻「喜蓮歡星」，但大家千祈咪睇少呢隻「多名利」，話晒都係上季香港瓶冠軍，今季狀態起得較遲，早一輪頻頻出外征戰，一時跑杜拜，一時往澳洲上陣，雖然呢幾次遠征成績都唔理想，但從角逐過程之中，呢隻「多名利」不知不覺在狀態方面提升唔少，現時又見回復多少活力及生氣。「多名利」今季屬第四季在港上陣，對上三季在港出賽，每季都贏一場二千四百米，首季呢隻馬就係擊敗「智多飛」贏皇太后盃，翌季壓倒「威利加數」蟬聯皇太后盃，上季進一步升級贏香港瓶，今年暫時到目前為止未贏過，呢個遮打盃，可以話係呢隻馬今季最後有機會爭到頭馬嘅場合，睇吓大摩又點擺計嘞。