 放大圖片
之前奧運倉四子，齊齊向馬會上訪，要求改善佢哋嘅馬房設施，又話游水池距離四倉太遠，要使用認真唔方便，於是馬會高層同佢哋開會，盡量諗辦法去改善，據聞有機會喺�哋四個馬房附近加多個泳池，專係俾佢哋用。當然一時三刻，點可以話加就加，最快都要暑期至施工，不過，另一方面，又收到胡森經已獲得調遷馬房，由奧運倉調到機坪幾座原本用來作為隔離營嘅馬房暫居，呢一批隔離營嘅馬房，有六座咁多，每一座可以放五至六駒，咁即係講，現時得番二十零隻馬嘅胡森，搬過去就弗晒。
胡森收到通知，可以搬到呢幾個隔離倉暫住，佢老人家當然槲飯應，由星期二開始，逐步將啲禾草雜物，搬入呢幾座隔離營，不過，佢亦有先後次序安排，近期冇賽程嘅馬先搬，有賽程例如剛剛夜馬有上陣，或呢個禮拜日有份出賽就遲啲搬。據悉，呢個禮拜六，胡森經已準備好個儀式，替搬過去重新安裝嘅關帝像搵師傅再執吓位，希望真係可以轉到運，季尾呢一個月賽事，希望有奇蹟發生。
講番呢次日賽，胡森出馬唔多，最有機會就係落王牌報名嗰兩隻泥地馬，一隻「威勢之寶」，另外一隻「歡欣滿載」（圖12號），前者跑三班賽，冇乜着數可言，因為季內幾場上名或勝出，都係跑四班賽。至於「歡欣滿載」，五班當然有着數，睇佢今季贏嗰場泥地一哩，半條直路由黃皓楠殺上贏「萬能之功」及「帶運伯樂」，贏到對手冇得跑，雖然之後再跑兩場無功，呢個就係一般五班馬嘅通病，狀態比較難維持一個穩定水準，尤其是贏完嘅馬，體力多數有影響，所以再出能夠交番兩席第四名，經已算佢本事。呢次「歡欣滿載」回氣完畢，跑番贏馬路程，負磅又唔重，樣樣贏馬條件都夾番晒，應可再替胡森馬房增添頭馬。
|
放大圖片
