 放大圖片
昨日牌照委員公布，下季有牌騎師名單，一如所料，杜利萊、薛寶力及巫斯義都冇牌，雖然上述騎師都冇牌，但最近日子未見佢哋軟手軟腳，反而更加抓緊機會爆冷，事關現時搵銀嘅機會經已唔多，仲唔好好把握，真係可能連水腳都冇。睇睇上個禮拜咁，巫斯義替大摩「人民武士」取勝，至於薛寶力，亦唔執輸，即刻憑件「春意溢然」贏番場頭馬，之後其實薛寶力仲有機會贏馬，例如隻「縱橫大地」，一心想將假想敵「華恩庭」打敗，但冷不提防，原來黃雀在後，俾潘頓「辣得很」殺出重圍取勝，如果唔係，薛寶力有機會起孖威威咯！講開呢一批來季唔當公司騎師嘅好手，餘下日子，就係佢哋表演嘅時刻，大家要有心理準備佢哋會連場搏殺，潘頓及莫雷拉未必好似之前咁，隻隻實力馬都跑到出來。講番薛寶力，其實有唔少練馬師都開始重用佢，例如吳定強嗰隻「有情風」，今次照樣再交番佢舞，希望喺臨收季前多贏一場頭馬，另外，葉楚航又有隻「天地福星」（圖前駒）交俾佢上陣，當呢類騎師冇晒心理包袱之後，坐騎陣上的演出往往意想不到。
季初「天地福星」曾經由薛寶力騎過取得亞軍，呢次人馬重逢，當然係機會分子，上次呢隻馬跑谷草千二米，大敗八個半身位，賽後鞍上人薛寶力話關注呢隻馬動作，於是送去仄吓，查過一切都好正常，當然，跑馬嘅嘢，一時失水準好難講，仄過健康冇問題，復課又可以經得起正常操練，只要有狀態，再追都無妨，再睇薛寶力肯再同呢隻馬上陣，當然有佢可取之處，提防今次施回馬槍。
今次「天地福星」雖然排個十二檔跑，但有資料顯示，呢隻馬曾經排十檔得第二名，只以頸位輸俾「無敵城堡」，今仗留衝一段，有力爆鑊杰。
|
放大圖片
