 放大圖片
今晚谷草跑八場草地賽，以C欄C加3彎跑道作賽，頭場下午七時十五分開跑，三T及六環彩均無多寶，全日重頭戲為一班馬跑千八米競逐跑馬地銀瓶。練馬師成績榜目前頭三位大摩、蔡約翰及方嘉柏俱為冠軍寶座搏殺，他們的參戰馬值得優先留意。騎師方面，雷神及潘頓均要睇實動向。
第一場、第五班、一○○○米。「至尊駿爵」喺上手吳定強馬房廿一戰仍未發市，不過季內評三十九分出爭田草千二米曾跑入冷Q，該役配李富操刀排一檔，沿途擺前領放，鬥到拉士才被「特務飛龍」追越跑亞席，而後駒打後喺四班再取兩W，足可反映「至尊駿爵」現評三十六分喺此群作賽佔盡先機。剛賽敗後轉賢廄，試泥閘也見走勢對辦，今次渡江縮爭一千，有力贏馬省靚招牌。
第二場、第四班、一二○○米。「醉中意」三歲仔季內表現扶搖直上，直到季中交予潘頓接手，出爭谷草千二條件賽打開勝門；隨後再爭同一路程，結果力戰影相叮噹飲恨；上月初報名再戰，卻因賽前仄到患上皮膚病被勒令退出，不過小休後已再安排操練，埋門由潘頓出試泥閘更見成熟感，磨利始復出，隨時可再傳捷報。
第三場、第三班、二二○○米。「安荃」（圖前駒）四歲英國馬跑到季中階段撻着車頭，最近四場跑獲一冠三亞，而近兩次上名分別喺谷草千八及二千二，證明此駒跑谷草大長途一樣啱跑。而此駒特性與其父接近，喺外地擅跑長途，而且演出好開就好。「安荃」正值起飛期，今次再戰谷草二千二，有力衝擊季內第二場勝仗。
第四場、第四班、一○○○米。「紅衣前進」蔡廄當紮短途之輩，上仗出爭谷草一千米，在田泰安胯下留頭鬥後成功衝擊頭馬，呢場配綁脷帶排一檔起步唔快，鞍上人沿途留守馬群中疊，轉入直路抄出外疊打衝鋒，最後開摩打腳衝贏對手開胡，而今練者瞄準勝途，續由贏馬功臣田泰安壓陣，只要交出水準，具連捷機會。
第五場、第四班、一六五○米。「紫電明珠」今季先由雷神喺五班千四米打響勝門，繼後接戰田草千四皆近而不勝，直到上賽轉爭谷草千八，跑到咁長勢估唔到表現更為出色，排十一檔起步蝕章，不過雷神照爆切入跟住「董事長」，大半程走二疊，最後入直路踩油加速走甩掄元，今打鐵趁熱縮爭一哩，隨時再斬四両。
第六場、第三班、一二○○米。「大勝利」四歲南半球馬來港後評六十七分，初出跑田草千二米，在杜利萊胯下力戰不敵「有醒」馬頸位未竟全功，而打後六仗獲一亞一季仍未發市，再看前仗回配阿杜出爭此程，如非拉士沿欄衝刺窒步，頭馬已可到手。今賽前再試泥閘走勢銳利，現捲土重來，若臨場有墊底飛可優先捧場。
第七場、第一班､一八○○米。「活力歡騰」季初喺谷草一哩及千八有贏有位，預計可成為跑馬地百萬狀元，豈料喺一月廿八日贏千八米後，所呈交的尿液及血液樣本被驗出含有違禁物質，最後呢場頭馬被取消資格，及後重新振作喺田草千八贏出精英碟總算有個補償；上場出爭二千四遮打盃也沿欄力戰僅負跑第五，而今復爭谷草千八強項爭盃，已手執盃耳。
第八場、第三班､一二○○米。「有心人」蔡廄T布早熟中短途佳駟，季尾插班初出谷草千二米一出即勝，贏馬後續攻勝途，當晚賽事雖然跑淋地，形勢不利後追馬，但係此駒仍可在雷神胯下發揮凌厲後勁制敵添食，足證跑窄場實力深不可測。復課老蔡再安排此駒試泥閘，未見有收手意圖，今仗升班負輕磅，三捷機會睇好。
|
放大圖片
