 放大圖片
■錢小豪認為做人最重要是不要氣餒。
錢小豪相隔19年再為無綫拍劇，《潮拜武當》表面上是功夫片，但當中包含不少道家哲學，就是叫人放下包袱，也因為劇本，而感動到小豪。每個人心中也有包袱，能否「放下」就看個人的修為。小豪其中一個未能放下的包袱，包括因為第一段婚姻的失敗，跟大仔錢景峰的關係疏離，這是一道難以修補的裂痕，小豪只望有一天大仔打電話約他飲茶已心足。本周日就是父親節，希望小豪會收到這份禮物！■採、攝：植毅儀、服裝：Vivienne Westwood
早於20年前，錢小豪因為一系列的殭屍電影而陪伴着香港觀眾長大。小時候看《大頭綠衣鬥殭屍》已經對錢小豪印象深刻。今次小豪相隔19年再為無綫拍劇，只因監製的劇本理念打動自己。「個劇講道家哲學，叫人放下包袱，去到我呢個年齡，咩都睇化要懂『放下』。特別做我們呢行，每個人的際遇都唔同。我17歲拍《飛狐外傳》時已是一線男主角，又拍咗一系列的殭屍片，後來去內地及台灣搵食，大家知道我識功夫，又畀機會我去拍。可能有些人會覺得現在錢小豪唔再係一線，甚至在內地二、三線都照拍，其實唔好畀幾多線限死咗自己。像麥浚龍搵我拍《殭屍》，佢同我見面已經話個劇本係為我度身訂做。運就係自己行出嚟，做人最重要是不要氣餒，有角色就盡量做好，最後一定會有人欣賞自己。做呢行咁耐，見過好多人放唔低，成日講以前幾威，最終令自己好辛苦。」
說放下，有時說就易做就難。像錢小豪也有自己的心結，就是和大仔錢景峰的關係一直很疏離。錢小豪跟首任妻子郭秀雲於1990年在澳洲結婚，不久誕下兒子錢景峰。可惜婚姻只維持了不足三年，兩人分居並離婚。大人離婚，苦了小朋友，錢景峰2歲左右就跟媽媽生活，說起這段往事，小豪不禁一臉失落。「佢（大仔）2歲左右我們就要分開，當中想見面但安排唔到，有些事已經過去咗，唔想再講，始終人哋都嫁咗人，大仔又成長咗，總之我好少見到佢。現在佢大個仔，有自己生活，如果有一日佢喺電話講『Daddy，出嚟飲茶』，我梗係開心啦。」
細仔受影響愛上賽車
大仔從小到大的生活片段，對錢小豪來說幾乎係空白一片，幸好老天給予他第二次做爸爸的機會。2001年和現任妻子丘倩鳴完婚，婚後亦育有一子錢穎德，現在囝囝13歲踏入青春期，和小豪相處融合。細仔亦受了他的影響愛上賽車，剛於5月中，細仔完成人生第一場賽事，小豪大讚兒子有天分。「眼看囝囝逐漸長大，自己開始有不捨，所以咪要多點共同嗜好。以前成日一齊砌Lego，現在又同佢一齊玩小型賽車。我只係帶佢去認識吓，點知佢一試小型賽車就鍾意，去年仲考埋個初級文憑，跟住我仲安排佢參加埋比賽，佢攞到第四名！我想佢習慣大場面，賽車期間會好緊張，如果克服到這情緒，對日後做其他事好有幫助，佢話長大後想參加Formula One（一級方程式賽車）。」
說起細仔，小豪變得滔滔不絕，更指囝囝愛好表演，將來如果佢想入娛樂圈，不排除幫他一把。「佢8歲開始學舞，已經要記晒十分鐘的音樂同舞步，唔簡單。我個仔好有自信，跳舞跳得唔錯。如果佢將來對呢行有興趣，咪幫佢一把，總之讀完大學想做咩我都支持。」記者笑問小豪可會追多個女？他立即耍手擰頭，笑言這些任務還是留給弟弟錢嘉樂去做。
|
放大圖片
