 放大圖片
■朱千雪自認是傳統女生，對感情認真。
自認思想傳統 對愛情認真
朱千雪（Tracy）在《拆局專家》中化身電腦黑客，並與洪天明演一對閃婚的歡喜冤家。初次和天明合作，Tracy大讚對方不論在劇內定劇外都對自己照顧有加。劇中她因為酒後糊塗而閃婚，但現實中Tracy自認是傳統女生，對感情認真。如果將來拍拖，就希望對方是可結婚的對象。■採訪、攝影：植毅儀／服裝：Caxx Carash
正在播出的無綫劇集《拆局專家》中，朱千雪化身電腦黑客，和洪天明演一對歡喜冤家。劇中Tracy有別以往的角色，不時「野蠻女友」上身，印象最深刻的是將天明剝光豬，五花大綁遊街。「今次拍劇的組合好新鮮，以前同天明、家樂(錢家樂)在遊戲節目就已經合作。劇中我灌醉天明，仲剝晒他的衫同縛住佢，再車佢去市區叫人影相、遊街，玩到咁盡我都只係跟劇本做，不過我預咗畀佢報仇。其實天明好sweet，拍劇成日提個仔，你見到佢柔情一面。而且因為佢有功夫，好多時拍一些動作戲，佢都會事先教我點去拍。我有場戲被綁架兼掟落海，天明好照顧我。佢怕我在海沉得太耐，搵人拉我上來，令我好安心。」
另一半要理解自己
朱千雪參選2012年港姐成為季軍，入行3年多已經拍了不少劇集，未卸任即被欽點拍台慶劇《On Call36小時II》，今年更一口氣拍了四個劇，上位神速。但相對於其他港姐如黃心穎、師妹如陳凱琳及蔡思貝等，27歲的千雪絕少緋聞，相對來說令她曝光率比較低。「我唔介意曝光少，大多數緋聞都唔係真。緋聞少係好事，咁我可以選真命天子。講個秘密你知，我今年27歲，但拍拖次數5隻手指數得晒。由細到大，我都唔惹人追，只因小時候家教嚴，家人規定讀書期間唔可以拍拖，所以我很少拍拖經驗。將來如果拍拖，就因為想結婚。我不介意另一半是圈內人定圈外人，最緊要另一半理解自己，溝通到。但其實我又是一個宅女，只因自己唔鍾意嘈，自己圈中朋友唔多，最好朋友是岑杏賢。所以我唔會閃婚，因為要對一生一世，起碼都要拍一陣拖，而且結婚要同家人交代。我希望像我女神高圓圓咁，既有自己家庭，也有自己事業。」
閒時不停學習增值
朱千雪8歲時與家人移居加拿大溫哥華，擁有八級鋼琴水平，畢業於西門菲莎大學，主修商業和傳理。畢業後，朱千雪獨自到香港尋找工作機會。當行政助理兩年後，她決定加入香港小姐選美打開人生新的一頁。新一屆港姐將於30日誕生，朱千雪自言選港姐改變了自己整個人生。「選完港姐呢3年，我真係好幸運，做咗好多可能我呢世女都未必有機會試。例如我拍劇、拍電影、做旅遊節目主持，好多事都令我好興奮。拍電影《赤盜》與張家輝、張學友及余文樂共演多場對手戲。做旅遊節目去過杜拜、非洲，又代表香港到日本沖繩參加2012國際小姐競選，這些都是我參選港姐預期以外的事。呢行好多事不是自己控制到，沒工作時我會學東西去增值自己，例如現在學法文，學沖咖啡、學品酒，就算將來未必在這圈發展，也有自己的路去行。」
|
放大圖片
