 放大圖片
練馬師呂健威在馬圈內外都係出名的好好先生，形象穩健談吐大方得體，份人斯斯文文彬彬有禮，唔係講笑，至於練馬作風同佢形象一樣，處事穩陣應贏則贏，成績唔會大起或大跌，每一季都交番咁上下頭馬，近年有得力副練洪國興加盟，陣上搏殺作風更覺得心應手。呂健威現時養馬超過五十匹，只要繼續一貫作風，部署穩中求勝，成績一定可維持得到。呂健威馬房「英明神勇」（圖）前季在港初出跑第四，於嫌短的一千米直路賽也可追得接近，已初步反映有一定質素。到上季即露出真面目，加眼罩後演出異常神勇，共取得三冠一亞一殿，失獎金的一次是角逐變化場地兼賽後驗出氣管多血，可說是非戰之罪。
「英明神勇」上季跑至第三仗初戴眼罩上陣，雖則沿途守在好位，但直路一騎便輕鬆拋離對手，最終以三個身位之先勝出，而締造總時間更刷新了四班千四紀錄，可見此程實力相當厲害；之後再出升上三班角逐同一路程，對手明顯增強，改用放頭跑法也一樣奏效，而且贏馬姿態有餘未盡，蹄下敗將「神聖火炬」及「英才」等馬實力亦不簡單，可見「英明神勇」進步幅度甚大。推算「英明神勇」目前評七十九分在三班肯定未盡，仍有上升空間，由於跑法夠機動，新季如轉戰谷草一哩肯定更合，宜多加留意。
|
放大圖片
