 放大圖片
■于仁泰夫婦結婚將近二十五周年，仍然恩愛如昔。
香港文匯報訊 有荷里活電影「鬼王」之稱的于仁泰導演近日接受有線《星級會客室》專訪，與汪曼玲大談其電影生涯。
于仁泰拍攝過不少備受好評的電影，代表作品有《白髮魔女傳》，提到當年與林青霞及張國榮合作，于仁泰表示私底下與二人非常老友，「我記得有場講佢兩個喺水中纏綿，我叫張國榮要肉緊啲，唔好作狀錫下算，之後去搵林青霞傾，未開口佢已經問我『係咪傾嗰場戲？你想去到幾盡？』傾完佢都無問題，淨係話『唔好咁大力』，諗返都好好笑。」《白》不但成功得到觀眾注目，更為于仁泰帶來踏入荷里活電影的機會，「外國人好欣賞《白髮魔女傳》嘅美艷感，初時我以為佢哋搵我拍武俠片，點知原來係拍鬼片，但我從來唔睇恐怖片，當時去見老闆時，我坦白同佢講唔識拍，結果佢反而話『出面有好多人排緊隊，好彩你無好似佢哋答同一個答案』。於是我將恐怖片當武俠片咁拍，反正鬼唔係真，做咩都得。」
撐李連杰昂貴身價合理
其後李連杰邀請于仁泰回歸中國拍攝《霍元甲》，「好多人拍過《霍元甲》，我問李連杰點解要我再拍，佢話想藉一套戲將中國武術精髓帶出嚟，我覺得出發點好好，所以就應承咗。」當年李連杰身價已達1,000萬美金，但于仁泰解釋是合理價錢，「如果你每日見到佢食大包止痛藥，你就會明白武打演員嘅苦處，絕對係辛苦錢嚟。」
于仁泰自小患有小兒麻痺症，經常被人取笑「跛腳」，形成性格內向自卑，「我迫自己去外國留學，做導演又迫自己面對人群，咬緊牙關克服心理關口，好多人都話我現在同以前好唔同。」
于仁泰坦言因太太沈月明而改變，當年對太太一見鍾情，結婚將近二十五周年，二人仍然恩愛如昔，于仁泰稱太太值一百分，「太太係一個好善良嘅人，永遠睇到人好嘅一面。佢成日叫我放低個病對我嘅陰影，唔好咁執着。」曾任電影宣傳的沈月明婚後跟隨于仁泰移居美國，放棄事業仍無怨無悔，笑言不介意做「阿四」：「我同佢拍拖時好多朋友反對，但其實佢好專一，我哋都鍾意寧靜嘅生活，到今日我哋都有好多話題。」
|
放大圖片
