|
今季跑咗四次賽事仍未能開齋嘅蔡約翰馬房，今次賽事擺出強陣，如無意外，有機會連番數胡打破僵局。
上季始上陣嘅紐西蘭自購馬「華恩庭」，全季四戰得冠亞季殿各一，保持未甩獎金名次，演出準繩，今次在一戰即勝嘅田草千二米再上陣，蔡神仙對馬匹嘅機會分析說：「馬兒不但質素高，演出亦準繩，來港前在紐西蘭兩戰得冠亞各一，由於出賽次數少，估計未來仍有相當多的發掘空間，上季最後一戰首次角逐二班賽，賽前對佢冇乜信心，畢竟該仗強手林立，沒料到能夠跑得殿軍而回，幾乎與季軍馬『日威夜威』同到，證明隻馬響二班是不吃虧。而且經過一個暑期成熟有顯著進步，九月八日試咗課泥閘，以輕鬆姿態領放到底，進度令我十分滿意。今次縮番跑千二米會更合發揮，畢竟呢個路程未輸過，只要到時形勢唔太差嘅話，便有機會贏得頭馬。」
在泥地累積兩勝六位的「勁開心」，今次出戰四班泥地一六五○米，此程上季於三班曾擊敗過「優勝」，蔡神仙表示：「隻馬泥地性能好，在四班亦有點優勢，加上賽前試大閘走勢都唔錯，縱使狀態未算十足，但亦足夠有勝出嘅條件。」
|
