|
新投注玩法「組合獨贏」，上周日已正式登場。玩法好簡單，類似越洋直播海外賽事括弧號碼，即係一個號碼之內包含多於一匹馬，任何一匹勝出均可獲得派彩。不過括弧號碼只會喺出賽馬太多時先至採用，而「組合獨贏」就任何賽事只要出馬七匹以上都開設。基本上將一場參賽馬分為三組，將隔夜賠率顯示大熱、次熱列為第一組，叫做「隔夜熱門」；第三、四、五熱門列為第二組，叫做「隔夜半熱門」；其他的全列為第三組，叫做「其他冷門」。換言之，永遠只有三瓣，有別於正規獨贏出幾多匹馬就有幾多瓣。
馬會以前亦推出過類似的玩法，但唔係以隔夜賠率冷熱分組，而係以馬號分組，不過就好失敗，玩一兩季就取消顯見唔多受歡迎。為乜失敗過一次，馬會又要搞相類似玩法呢？上次失敗唔在於點樣分組，而在於另設獨立彩池以接受投注。獨立彩池投注額細，呢次唔同係「組合獨贏」並非獨立彩池，亦唔係好似「騎師王」咁由馬會開盤，而係將注碼溶化入本身已有的獨贏彩池裡面，情形似四連環合併入四重彩彩池，此中計算當然複雜，你我唔識計但電腦識計，呢個新玩法無所謂成功與失敗，因為獨贏彩池本身已有龐大投注額，將「組合獨贏」注碼注入，正是多多益善少少無拘，馬會提供多一個玩法而已。
|
