 放大圖片
周日十場谷中日賽，蘇保羅馬房有七駒報名，其中三駒為後備，正選馬「燈膽大師」（圖前駒）竟然有保護權之餘，仲要加埋馬房王牌確保能出賽，使唔使咁心急呀？灰馬「燈膽大師」今季兩度試閘，擺明已經仄準性能，家陣咁猴擒出賽，話無計真係無人信。香港有成千二隻馬，莫講話競爭激烈，有時要匹馬有機會出賽，都要出動馬房王牌或者有優先出賽保護權，通常有後者就好大機會做正選出到賽，但如果怕咁都唔夠，出埋馬房王牌就最穩陣。翻查「燈膽大師」底蘊，此駒未周歲在紐西蘭時身價為六萬五千紐元，到周歲時由目前香港的馬主以十一萬紐元投得，於當地試兩次大閘全勝，第一次試八百米閘勝出，亞軍其後贏兩場並於G1紐西蘭打吡大賽跑第三；第二次試一千米閘再贏。「燈膽大師」來港後上年尾試谷閘大敗，今年頭七個月晨操空白兼曾放草，因曾發現左右骨盆不平衡、左邊髂骨翼應力性骨裂，幕後既然肯花時間、金錢、耐性去養好匹馬，今次初出揀谷中上陣肯定是有備而來，翻查昔日同主馬「燈膽王」贏過五場成績最好，另外「燈膽寶」服役時亦取得四贏五位紀錄，可見幕後屬有養馬運之人，如今最新呢匹「燈膽大師」捨吳定強改與蘇保羅合作，估計會盡快取得好成績。
|
放大圖片
