 放大圖片
今個禮拜雖然無夜馬跑，但越洋轉播賽事一個接一個，繼昨日轉播墨盃賽馬日賽事之後，本周六又有七場阿聯酋錦標賽馬日賽事於澳洲舉行，馬迷可以話比平時更唔得閒。講番點解連續兩個禮拜三無夜馬跑，據聞編賽期嗰陣時，經已預咗呢個禮拜三無夜馬，原來本星期六國內成都搞咗場全國速度賽馬大獎賽總決賽，香港馬會為中國馬術協會提供唔少技術支援，同埋相關技術人員，而馬會一班高層亦都準備好出席呢場大賽。點知一切制作程序辦到差唔多之際，由武漢運去成都批戰馬，發覺有病毒感染情況，大家都知道，現今國內檢疫制度仲未咁完善，馬匹一領嘢，事件可大可小，所以呢單嘢，當局想低調處理，搞唔成都無計，所以今個禮拜三無夜賽舉行，事件大概來龍去脈就係咁。雖然呢個禮拜三無夜賽，但部份香港騎師則依然馬不停蹄，繼續為賽事而奔波，事關呢個禮拜，正如先前所述，有墨盃又有阿聯酋錦標，好彩就係無夜賽，去得澳洲出賽嘅騎師，唔使飛來飛去兩頭騰，索性逗留喺澳洲一個禮拜，跑完先至返香港跑周日賽事，你話盞唔盞。
潘頓喺墨盃騎隻大熱門馬「成名遊戲」，最終跑第十三名而回，演出稍令馬迷失望，呢位仁兄今季因為季初養傷關係，成績俾莫雷拉一早彈離，不過咁，運氣呢家嘢，似乎陸續黐番喺潘頓身上，據講呢個禮拜日，佢獲大摩「活力歡騰」（圖6號）支持上陣爭婦女銀袋，大家知唔知道，對上一隻潘頓騎大摩出賽嘅馬係幾時嘅事？翻查資料，經已係上年一月十九日騎「軍事出擊」跑董事盃，得第四名後騎練便再無合作，今次破冰，會唔會重新有個好開始，的確要拭目以待。
今次潘頓騎大摩隻「活力歡騰」出戰婦女銀袋，所跑路程屬千八米，呢匹馬至今兩戰此程全勝，而今季已有兩場田草中距離賽事作熱身，今次進入第三回合，埋門狀態已見越來越好，加上今次由潘頓執韁鬥志鮮明，相信是匹爭勝實力馬，不過「活力歡騰」要贏這場贊助賽，最強的對手還是要過「直震撼」這關。「直震撼」上場跑谷草一哩，雖然輸給「馬上發財」，但本身能夠憑級數，喺負重磅下跑入一席第二名，以當時的狀態而言，這駒根本並非在最佳水準，幕後亦一早揚言，出擊主力目標是今仗婦女銀袋千八米，所以谷草一哩這戰志在熱身開氣，能夠跑得幾多便幾多，果然這匹「直震撼」在韋達胯下輕描淡寫便跑入一席第二名，今次磨得真正好水準出戰千八米，已有很大機會補中。
當然，除「直震撼」外，「活力歡騰」還有一些狀態正勇的實力分子要應付，賀賢新勝的「格哥兒」便是其中一駒。「格哥兒」在上場於此程爆三十多倍冷門獲勝，雖只以頸位之微贏「期惑」，但論本身狀態依然並非處最佳水準，勝在本身路程拿手，今回再來無疑對手是增強了，但以這駒現時大勇水準，當然有足夠本錢與任何對手周旋。目前來說，婦女銀袋賽暫時以「活力歡騰」、「直震撼」及「格哥兒」三駒的實力及狀態最為對辦，相信冠軍之選，應不出這三駒之內，至於其他有機會爭入前三甲者，大家不妨等待排位之後，再看其餘幾位前列騎師所揀的坐騎是甚麼，屆時才加以兼顧。基本上這場婦女銀袋賽，爭勝機會秤先「直震撼」，次選是「活力歡騰」，「格哥兒」則是第三選擇。
|
放大圖片
