 放大圖片
■湯鎮業想新一代觀眾認識自己。
湯鎮業（阿湯）相隔30年再返無綫接拍台慶劇《梟雄》，於劇中與視帝黎耀祥及影帝黃秋生互相「鬥戲」。成為六個孩子的父親，家中一對孖仔湯君慈及湯君耀早前趁暑假回港行騷搵外快，不少人大讚他們高大靚仔，湯鎮業自言只要仔女完成大學學業，不介意他們入行！■採訪、攝影：植毅儀
訪問一開始，跟湯鎮業閒聊起，約半年前在TVB的餐廳撞見湯鎮業，當時筆者覺得中佬湯相當有型，聽到記者的說話，湯鎮業拍一拍肚脯，幽自己一默說：「如果冇呢度可能會更好，這十幾年在內地發展，有很多應酬。」
想新一代觀眾認識自己
相距30年再回TVB拍劇，湯鎮業於台慶劇集《梟雄》中與視帝黎耀祥及影帝黃秋生互相「鬥戲」。阿湯自言今次返TVB拍劇像一個新人，咩都要重新去學習及適應。問到今次是否被監製王心慰誠意打動，阿湯坦言本身同監製唔認識，但因為對方身邊有相熟的朋友，看完劇本後，被劇本所吸引。阿湯說： 「本身同Amy（王心慰）唔識，但佢好有誠意地找人找了我幾次，呢部戲覺得都有得發揮，我推推吓唔好意思，咁巧我的仔女在美國讀書，暑假啱啱返嚟，套戲暑假拍，可以同仔女聚吓，咁就返咗來。今次返TVB，自己十足一個新人。拍攝場地是新的，好多幕後工作人員都是新的，最初有點不習慣。雖然如此，自己都好開心整個拍攝過程，角色也很能滿足到自己。講真，香港新一代，因為冇咩幾多人認識我，不要說其他，連我大的幾個仔女都唔識自己，大女見到我以前的相，仲話我以前咁靚仔，現在成個豬肉佬咁。所以返來拍劇，讓新一代認識下我都是好的。」
做番自己已經好好睇
湯鎮業早於1996年已經回內地發展，那個年頭，內地的觀眾幾乎是看TVB劇大，對於這個八十年代「無綫五虎將」之一的藝人，內地觀眾都十分熟悉。近年不少香港演員北上搵真銀，湯鎮業卻反其道而行，記者笑問阿湯是否想把工作重心放回在香港？湯鎮業說：「我唔係將重心放回在香港，好多人問我和秋生（黃秋生）、祥仔（黎耀祥）『鬥戲』會否有壓力？其實點會有壓力。我在內地一向有做戲，呢部戲駕輕就熟。翟金堂是一個好有霸氣的人，我在內地拍劇，都是多演有霸氣的皇帝，所以沒難度。我們三個大亨行出來就冇話邊個搶邊個戲，今次每個人物都有戲，好有張力。唔需要誇張去做，反而做番自己已經好好睇。」
劉德華與湯鎮業、梁朝偉、黃日華、苗僑偉於80年代極受歡迎，稱為「無綫五虎將」。這五個人雖然在事業上各有不同的成績，但仍沒損大家多年來的感情。像阿湯每次回港，也盡量相約一班老友吃飯敘舊。說到近年在內地做生意好難，阿湯寧願多拍戲。「我們五虎都有Keep住敘舊，我之前都笑華仔做咩投資電影咁辛苦。近幾年我都少了做生意，一來競爭大，二來請人又難，還是拍戲最舒服。在內地拍戲，寫明每日拍幾多小時，好舒服。」
多謝太太教子女有方
如果說湯鎮業是「多仔公」相信連他自己也不否認，和3位太太所生的6名子女，最大的大女已經22歲，而最細的一對孖女才7歲。早前另一對孖仔湯君慈及湯君耀趁暑假回港行騷搵外快，不少人大讚他們高大靚仔，問到湯鎮業日後會否提攜囝囝入行，阿湯表示只要他們完成大學，就由他們自己話事。「大女在美國UCLA（加州大學洛杉磯分校）讀media，好多人搵過佢入行，但佢冇興趣。佢讀media，我相信將來都有前景，現在內地電影咁犀利，如果能夠lineup到合作，做監製、製作人亦都好好。大女好主動，過美國讀書係佢一手一腳搞，唔使我操勞。兩個細佬考入同一間大學，需要幾多錢，我能夠畀到咪盡量畀。兩個仔還有兩年才畢業，等讀完書再講，有個名牌大學出嚟名銜點都好啲，打份工，人工都高點。早前兩個仔同我上內地做真人騷，酬勞未必好好，但劇組卻安排大孖坐飛機頭等，搞到家姐好羨慕。至於最細的一對孖女，一齊生活好開心，我好多謝她們的媽媽，教得好好。她們在青島讀書，傳統文化學得好好，知書識禮，七歲唐詩已經識背幾十首，我兩、三首都唔識背。」
|
放大圖片
