 放大圖片
唔經唔覺又到十二月份，呢個月係全季最高潮嘅月份，因為國際騎師賽及香港國際賽事都喺下個禮拜舉行，外隊馬將會陸陸續續喺星期六殺到，先唔好講國際賽呢批馬，講番下個禮拜三國際騎師賽，唔少人都經已嘜實啲名將替名下馬匹出戰。雖然編定國際騎師賽嗰四場，要抽配搭上陣，唔可以話想搵邊個騎就邊個騎，但其餘五場，如果練馬師夠牙力嘅話，真係有機會搵呢批名將客串一下。講開搵名將客串，英國好手莫雅，香港國際賽事最初只得岳伯仁隻「高地舞人」搵佢出戰，角逐二千四百米香港瓶，點知日本仔醒目，先有跑香港盃隻「新紀錄」及後有香港一哩錦標隻「滿樂時」均搵佢上陣，莫雅當然冇所謂，難得有馬上陣，贏唔贏到屬其次，起碼有份跑就有得爭。日本仔咁醒目，搵到呢位世界好手替佢哋嘅馬效力，香港亦有練馬師唔執輸，呢位屬苗禮德是也，香港短途錦標嗰場，馬房有隻「龍城勇將」出戰，阿苗亦醒目第一時間搵莫雅跑，莫雅立刻應承全因佢同苗禮德夾過唔少檔，並且交出好成績，大家諗番下，莫雅曾經有屆贏香港國際騎師錦標賽，佢都係全憑抽到苗禮德隻「勁擊」取勝，其實之後仲有其他場合替苗廄贏馬，如「積多福」及「幸運雄威」等，都曾經由莫雅贏過，所以「龍城勇將」搵佢跑，顯然亦係有多少默契。
跑完香港國際賽，巫斯義就要開始停賽，而佢個主帥牌到十二月就約滿，續唔續到約，仲未有消息，不過，未續到約前，佢要停賽六日，即係話即使續到約，亦要等到一月尾先至有得跑番，跑完香港國際賽，放假又或者失業，呢幾次賽事都要積極搵水腳或度假費，第四場「旅英公爵」（圖8號），今季三戰，兩仗於草地短途獲一冠一亞，上仗輸泥地，呢次返草地千二米俾主帥出戰，又有機會再贏。
|
放大圖片
