 放大圖片
■陳慧琳難得與兩個囝囝同台。
香港文匯報訊（記者 李慶全）陳慧琳(Kelly)的「Let's Celebrate！世界巡迴演唱會2015」前晚舉行到第五場，於冬至一家團圓好日子，Kelly亦偕大仔Chace(劉昇、蝦餃仔)，細仔Riley(劉琛、小籠包)上台跟歌迷見面，兩個小朋友可愛地拖實媽咪手及揮動熒光棒，伴着Kelly唱《星夢情真》，最後還攬實媽咪不放，差點不肯返落台，場面溫馨又搞笑。
Kelly於台上說：「做阿媽真的不簡單，我覺得比做歌手更難！」唱完歌她蹲下身攬着兩個仔，叫他倆不用驚，還要跟台下爸爸打招呼，她更不停叫觀眾拍多些照片，因機會難得。Kelly又叫小籠包晒可愛給大家看，萌爆的小籠包即笑晒伸出舌頭，觀眾都被冧到暈。Kelly又將咪高鋒遞到蝦餃仔面前，六歲的蝦餃仔清晰地說 : 「Merry Christmas everybody！ I love you Mum！」到三歲小籠包，雖然講話不算太清楚，但也好叻跟住哥哥照講一次，見哥哥話嗰台高驚驚，他也大大聲話：「I scare of this high too . 」可愛模樣令全場觀眾開懷大笑。
公開感謝老公
接着Kelly吩咐兩個仔說：「好啦，要返屋企啦。返到去要即刻瞓覺呀！」然而兩個仔都搖頭不肯走，Kelly助手只好上台幫手拉兩個仔離開，但兩個仔即嘴扁扁不理助手姐姐，Kelly無奈不停氹兩個仔：「一係咁啦，明日再來過啦好唔好？乖乖啦，隔多幾日媽咪再見你哋，好唔好？」雖然出動慈母真情，但兩個仔卻無動於衷，大仔只管攬實Kelly不放，細仔又跟着照做，Kelly一手攬一個，結果要助手及外傭齊上台夾硬才把兩個小朋友帶走。Kelly一臉依依不捨地跟兩個寶貝說拜拜，才鬆口氣說：「大家沒見我幾年，就係生咗呢兩件出來啦！」有歌迷即回應她大叫：「整多件！」Kelly答謂：「爸爸辛苦一點， 我反而沒這麼辛苦，爸爸日日凑住嗰兩件，我開演唱會在台上面講真都幾享受。」到答謝環節，Kelly眼濕濕公開多謝老公Alex以及父母家人：「多謝我老公......咁明白我，支持我咁多年啦。我老公叫我唔好喊，佢話你唔好喊啦，啲人以為你黐線！但係我忍唔住嘛！」當日阿Mark(雷頌德) 出場與Kelly對唱，而張家輝繼續上台做表演嘉賓，關詠荷及女兒則於台下為爸爸打氣。
|
放大圖片
