曹敏莉自揭與夫曾分開

放大圖片

香港文匯報訊 陳法蓉、曹敏莉首次以慧妍雅集委員身份，一起接受汪曼玲訪問。陳法蓉及曹敏莉於不同年份參選香港小姐，二人都取得冠軍。陳法蓉透露當年原來以為自己患有癌症而參選，「我以為自己有癌症，最後發現無事，我媽咪都係咁走，所以我覺得人生想做就去做。我由細到大都有睇港姐，細細個就會扮得獎繞場一周，一直都想做香港小姐。」曹敏莉則自爆自己是宅女：「媽咪覺得我成日匿埋喺屋企，好似宅女咁，就鼓勵我去選美，我當時得20歲，無諗咁多，只係不停同自己講一定會贏。」

已婚的曹敏莉坦承與現任丈夫曾試過分開，「愛情真係講緣分，我同老公有時感情好好，有時又好想打佢，需要慢慢協調。」曾是五料冠軍的曹敏莉，更修讀了珠寶設計學位，現在則變成相夫教子的好太太，會否浪費了才能？曹敏莉解釋：「現在的確係畀多啲時間照顧小朋友，但唔會浪費，我會將以前學過嘅嘢教返畀小朋友。」雖然陳法蓉仍是單身，不過她直言並不心急，「我有一大班朋友，大時大節都會預埋我，家人又無畀壓力我，所以我仲好享受單身，身邊朋友全心照顧小朋友，我可以隨心做想做嘅事，係另一種方便同開心。愛需要好多嘅包容，唔係隨便搵一個人就得，而且『寶物沉歸底』，歡迎大家嚟追我。」曹敏莉在節目中大讚對方是「筍盤」，搞笑呼籲單身者快來追求陳法蓉。

「慧妍雅集」現時擁有逾百名會員，大家在開會時難免會有不同的意見，身為會長的陳法蓉強調對事不對人，「我哋全部人都係義工，無個人利益，都只係為件事好，有爭拗時就慢慢商量或者投票方式解決。」