 放大圖片
莫雷拉屬於神級騎師，好多時隻馬點樣發揮，練馬師通常都會交由佢自行處理，不過，未必每匹馬都見莫雷拉發揮得最好，有時都會搞到幕後頂唔順，終於要換人上陣。例子之一，就係今次夜賽喺第一場五班列陣一千米霍利時馬房嘅「快趣的」（圖前駒）。
霍利時呢場馬賽前共有兩駒報名，一隻係「快趣的」，另外一隻係「樂趣」，前者以第一優先權報名，後者則用第二參賽權，結果「樂趣」只能列作後備，呢隻前主席馬，今季跑三仗，兩仗上名，最近一仗跑谷草千二米，因排大外檔先至落敗，但點都好，倉主既然將隻「快趣的」放喺第一位參戰，肯定有計。當然大家心會諗，呢次「快趣的」莫雷拉唔騎，用郭能跑又點會化腐朽為神奇。其實，莫雷拉係咪騎得呢隻馬好好，咁就真係見仁見智，尤其呢兩仗由莫雷拉接手，前一場放頭跑得第二名，上場再出又係放頭，仲衰只得第三名。其實「快趣的」喺未交俾莫雷拉騎之前，何澤堯、田泰安同黎海榮都騎過，全部都以後上姿態取得位置，且衝勢都幾強，不過近期由莫雷拉接手後，大師傅用佢唔同演繹手法去發揮呢隻馬，陣上連放兩場得位，雖然演出準咗，但陣上所見，好明顯呢隻馬，夾硬逼咗囥魊Y，末段勁度比起之前差好遠，無奈莫雷拉輸完一次，再輸一次都係用同樣戰術，幕後睇到唔多對路，於是今次起用郭能。
講真呢次「快趣的」用郭能幫手，情況就好似隻「超甜橙」咁，好多人都騎到冇符，霍利時就搵呢位英國好手試一試。結果就俾佢跑入一席第二名，同「金叻星」鬥到影相分高下。今次隻「快趣的」，明顯又係要搵佢幫手打破悶局，上兩次輸放頭，呢次留後衝一段，相信會有唔錯效果，千祈咪以為係莫雷拉棄騎。
|
放大圖片
