文匯精選：活力小駒恃強凌弱

放大圖片

蘇保羅今季成績咁好，除谷馬得心應手之外，部署方面亦相當有心思，就以上個禮拜跑完嗰場四班直路賽為例，旗下一出即勝「實力飛駒」，假如第一仗唔係出戰谷草一千米，相信未必可以一出即勝。道理好簡單，呢隻子彈快馬，呢次跑一千米直路賽，排一檔早段照樣彈出，大半程領放，但拉士幾十米，立即腳軟落嚟，情況就好似隻馬初出贏谷草一千米咁，末段又係慢速，差啲俾「氣勢如虹」贏到，不過，嗰次就啱啱放到終點咁解。「實力飛駒」贏完馬，轉場地一試，再贏或輸，馬房經已冇壓力，贏就錦上添花，輸就下次跑番谷草短途，好簡單部署手法，不過，最成功就係馬房準確替馬匹先立功後至嘗試，否則明明一隻好有前途嘅馬，最後搞到喺中下班沉淪咁就無謂。

呢次谷戰，馬迷又可一開眼界，睇下蘇保羅點樣部署隻季內經已兩W嘅「活力小駒」（圖8號）。隻馬今季兩出兩捷，都係跑田草千二米，目前評82分，應該要跑二班賽，但倉主唔跑二班賽，等呢場三班谷草千二米，因為評分區拉高咗至85分，雖然「活力小駒」要負重磅列陣，但考慮到對手依然係三班貨色，形勢上非常着數，所以幕後就膽粗粗同呢隻馬初次出戰谷草窄場。當然馬迷會考慮到「活力小駒」會否一出即刻適合呢種場地發揮，尤其跑嘅係C+3賽道。大家睇一睇隻馬同父馬喺港表現，如「根深柢固」、「騰煌」及「靚先生」等，大部分都係識跑谷戰，相信「活力小駒」亦不會例外，咪以為佢閘前反應一般，大家假如查下佢上季贏過嗰兩場，頭段速度都唔錯，今季刻意用留前鬥後戰術發揮，當然，呢次跑谷戰，又係採用番季內所贏兩次模式，入直路至施施然追趕，好可能未必贏到，所以，賽前馬房好有心思同佢彈一課泥地大閘才上陣，練番好速度嚟應付今仗。