 放大圖片
跑完杜拜世界盃賽馬日，香港隊一場頭馬都無，亞洲區依然以日本最威，有武豐「天上樂園」贏阿聯酋泥地打吡，仲有莫雅騎隻「不撓真鋼」贏杜拜草地大賽。至於重頭戲杜拜世界盃依然係美國佬天下，伊偉舵騎前年呢項錦標亞軍馬「閃亮加州」，今次終於吐氣揚眉成功補中，港隊「準備就緒」喺莫雷拉胯下跑包尾。事後應總同傳媒講，香港賽馬水準雖然高，但時至今日，發展空間仍有侷限，好似近年好多人倡議發展泥地賽咁，應總話每年香港只得四百幾隻新馬進口，要發展泥地賽，定要入口一大批泥地好手，如此一來，訓練場地又要多咗，設施又要增加，正所謂一闊三大，並唔係話要加強就可以加，編多幾場泥地賽就掂，反之可能顧此失彼，多咗泥地，減咗草地，到頭來草地馬成績倒退，泥地馬又未喺世界上稱到霸，咁即係盞搞，細心諗清楚應總呢番說話未必無道理。其實，香港賽馬模式好簡單，短途賽程多，馬主多購呢類馬，好容易喺短途方面屢創佳績，的而且確，呢次杜拜出戰，表現最好都係出戰阿喬斯短途錦標嘅「幸福指數」，馬會應向呢個大方向求成績反而最實際。好似呢次夜賽咁，田戰跑得唔好者，咪可以集中谷戰進取，出戰第七場三班千二米隻「紀利福星」，季初試過一次田戰，表現唔係咁理想，之後轉戰谷草，連續跑咗三仗，結果取一冠兩亞成績，呢次因為升班減磅關係，潘頓騎唔到至益蘇狄雄，雄仔執到好嘢自會搏盡。
|
放大圖片
