 放大圖片
今晚谷草編跑九場賽事，以移欄B欄C彎作賽，頭場開跑時間提前至下午六時四十五分，全晚唯一盃賽為蘇特恩盃編在第六場。馬房方面，蔡約翰及沈集成皆駐重兵城下，值得優先留意。騎師方面，當紅七磅見習生嘉琦妹之坐騎要留意，另外雷神當要重視，而最近不時攻入大冷位的湯智傑也要提防。
第一場、第五班、一二○○米。「勁駿皇駒」前仗谷草千二米贏得清脆，韋達轉完彎再走入內欄，最後一穿上就過晒；惟上場再跑此程，排四檔起步卻唔見太快，同上場作賽形勢唔係差好遠，最後得第五，今仗再戰千二，對手唔算強，三甲應冇失拖。
第二場、第四班、一六五○米。「怡德」以往韁口難操控，常於陣上人馬角力，但隨着年長後如今韁口改善表現便趨穩定，翻看前仗谷草一哩，留後卻遇上偏慢步速，令到末段力追不及僅負短頭位，屬應勝而敗；上仗再爭此程排五檔全程居中，入直路力追入Ｑ腳，今仗操好再戰有力贏回一仗。
第三場、第四班、二二○○米。「歐洲之星」前仗由雷景勳跑谷草一哩得第三，上仗相隔一周匆匆再來，不問可知是幕後心有不甘，打鐵趁熱求補中！表面上，剛仗是雷景勳揀騎「萬醒仔」而「歐洲之星」改配潘頓，惟潘頓賽後表示肯放棄騎開的「鼓浪飛星」而就之，更顯「歐洲之星」崇高地位，結果潘頓按韁大勝，現增程大長途，戰意可信。
第四場、第四班、一二○○米。「君子協定」前仗連嫌長千四米也放得有聲有色；上回評分跌至五十四分水位卒有迴旋之力，競逐五度入Q谷草最耍家強項千二即跑入Q腳，今次練者仍揀窄場誓師，交出水準必在三甲。
第五場、第三班、一○○○米。「香江穩勝」來港後一直養在告廄，十二戰五度上名，但一直與頭馬無緣，前仗在谷草千二米跑獲殿軍後，幕後決定轉投蘇廄，上回角逐此程，可惜前段唔夠快，最後只追回一席配腳，環看今場快馬多，此駒排一檔可貼欄守好位，入直路再打衝鋒全力爭勝。
第六場、第三班､一六五○米。「變出美麗」季中告仔安排轉戰窄場一哩便試出彩虹，大前仗配雷神爭四班同程，三倍大熱入直路一俾即大勝而回；前仗初升三班換韋達再戰，入彎留放差被帶向外跑，最後撲上姍姍來遲得梗頸負四分三馬位算出色；上次改配潘頓，結果再顯雄風贏三馬位，今回仍爭三班當有添食條件。
第七場、第四班、一六五○米。「實在威」喺二月中出爭千四米熱門跑獲季軍，翌仗換上雷神，開賽前不久，賠率走勢忽然起勁，可惜敗興而回。到前場渡江出戰谷草一哩，最後階段又見落飛，結果再敗一次，看來是名大於實。不過上仗練者再搵雷神競逐此程，沿欄力戰僅負敗得不忿，有過兩場作戰經驗，今次再跑可望補中。
第八場、第三班、一六五○米。「開心駿馬」四歲V布馬季內六戰，初出爭田草千四得殿軍，打後全攻谷草一哩，翌仗即在同程取勝且難度極高；接戰亡命搶放輸在發揮；大前仗再喺此程取得頭馬；前仗初跑三班未能放出仍入位有交代；隔咗一個月再跑此程，大熱鬥到拉士衝刺非強只跑第六。拚後由晉仔一手打磨，交出水準可穩位望贏。
第九場、第二班、一二○○米。「永旺年年」今季六戰獲兩冠兩亞一季一第五未失獎金，當中移師谷草千二米試出彩虹，首兩場谷戰均告掄元，而且陣上再不是只能放頭跑，甚至守好位留力末段鬥衝亦掂；前仗因為排十檔而跑得較為被動，但全程三疊都追獲季軍相當難得；上仗再排外檔，最後鞭長莫及追得第五，今回排靚檔定有最佳發揮。
|
放大圖片
