 放大圖片
「威利加道」和「將才」都倚重過莫雷拉搏殺，前者衝擊打吡失敗，其後再出仍無功，結果轉飯鑊投蘇保羅馬房，呢次日馬爭逐遮打盃，不過用寶遜騎，睇嚟仲要段時間打磨方有戰功，不過另一隻依然放喺告東尼馬房豢養嘅「將才」，前次由蔡明紹跑千八米，憑強橫後勁殺入一席季軍，再出馬房心急求勝，增程角逐跑二千米，更強配雷神，結果臨場捧成一匹三倍大熱馬，滿以為可以在強配胯下打開勝門，誰不知沿途跟好位嘅「將才」，最後四百米一衝，竟然變軟腳蟹。按道理雷神功力不會差得過蔡明紹，且跑法上亦未如前仗蔡明紹追得咁勁，事後檢討，唯一可以解釋就係隻馬有多少怕馬毛病，早段混於馬群之中，膽小情況下便難發揮出應有水準，前次蔡明紹搶得冷位置，兩個巧合情況下均針對到「將才」嘅馬性發揮。起步大落後，表面似不利，但可俾「將才」悠然自得，自己跑自己。到轉彎入直路，蔡明紹無得選擇下，只能抄大外欄望空衝刺，這亦正合「將才」怕馬的性格發揮，這兩個外表似不利嘅跑法，正是最合「將才」性能進取。雷神吸取上場失敗經驗，再替「將才」披甲。其實今次同場中，雷神仲有實力馬可選擇上陣，這匹便是「凱明神駒」，講近績這駒比「將才」更好，一二○磅雷神可造到磅，但偏偏莫雷拉再揀「將才」上陣，顯然想接受一下這駒性能的挑戰，告東尼經已失去一匹「威利加道」，這匹「將才」應該到了交代嘅時候。
|
放大圖片
