第四場、第三班、一八○○米。暑期小登科的梁家俊，在七月一日賽事起孖兼捧盃，今次谷草煞科戰他接手「可愛寶」上陣，呢匹葉廄馬最近兩仗改配莫雷拉操刀，即獲一冠一亞佳績，今場易配梁家俊執韁，鞍上人首次係華將，睇番梁家俊接手雷神馬匹紀錄，如「騰煌」、「永旺年年」由雷神贏完再出交俾梁家俊，一樣順利再贏而回，而最近「帝國之星」同「捷捷勝」配雷神搏殺失手，翌仗換上梁家俊取得一冠一季，成績不俗。既然「可愛寶」跑谷草合發揮，就算配搭有別，但獲減兩磅及鬥志鮮明，今次仍值得吼住。
第八場、第二班、一二○○米。論目前全港成績最好的老馬，梗係唔可以唔提李易達馬房匹老黃忠「享耆成」，呢匹九歲馬最近又贏一場谷草千二米，攞到本身服役第十場寶貴頭馬，真正稱得上係十全十美，事關在香港唔少一班好馬都未贏到十場，難怪馬主鄭錦鐘早排搞慶功宴，佢仲話好期待第十一場頭馬降臨。今次谷戰煞科賽，馬主就有機會達成目標，雖然「享耆成」升上二班角逐，但話晒係谷草千二米專家加埋有輕磅，馬房唔俾佢提早抖暑有心搏埋今場，田泰安今次隨時執到寶。