上周日女將蔣嘉琦食白果，反而梁家俊又起孖得手，依家前者得番兩場頭馬的優勢，相信今屆「告東尼獎」都要鬥到最後一場先分到勝負了。雖然蔣嘉琦目前有七磅減，但睇嚟呢七磅幫唔到佢本身騎功嘅缺點，馬迷唔應該盲目支持。當然，如果蔣嘉琦騎乖巧放頭的馬就係另一回事，尤其放頭馬加上減磅，在季尾真係一大殺着，但以騎者目前騎功，對住脾氣馬或者外檔馬都一樣冇計。好似文家良匹「威旺財」，跑法主動亦唔難騎，蔣嘉琦騎三次取兩亞一季，擺明合拍但就衰在贏唔到，結果文家良都要飛起琦妹，決定搵雷神打救，卜定佢出戰五班谷草一哩，雖然只係一匹五班馬，但雷神一樣當係寶，埋門親自過檔快試考驗。「威旺財」馬主係馬會大董郭志桁，佢自從一四年十月贏完「多旺財」後，呢件綵衣都未再試過拉頭馬。不過，今次由雷神出馬騎「威旺財」，睇吓可唔可以順利開齋啦。