大摩呢個暑假幫蕭百君入咗啲犀利武器，雖然隻新鮮出爐馬王「明月千里」喺晨操起後腳踢馬，自己撻傷有排抖，相信唔會影響馬房出戰各大賽安排，新兵陸續加入外，舊馬如「步步友」又好番。據聞今季大摩個倉亦有多少變動，有個姓何嘅馬伕，升職轉任大摩打料師，呢一位馬伕，如果冇番咁上下料，相信都好難坐上去，原來呢位姓何馬伕同馬圈有好大淵源，佢老竇係何國英，業餘時代當騎師，阿爺就係大馬主何文法，話晒都係大家族出身，由馬伕低層做起，做到打料師呢個位的確唔簡單，又一個從低做起嘅成巨狺l，最特別係望族出身，難得大摩又搵到呢啲年青人幫手，所以佢個倉幾時都保持競爭力，成績唔會退步就係咁解。
呢次開鑼日，大摩一早卜定雷神騎「甜統」，隻馬上季由布文贏過一場田草千四米，之後再上陣都未贏過，包括兩次由雷神操刀，呢隻馬有個特性，就係早段唔會跟得急，要逐段加速先至掂，最後直路爆一段，由於跑法被動，所以每每有姍姍來遲之感，呢次馬房開鑼日即替呢隻馬出戰千四米，並卜定雷神披甲，當然賽前對呢隻馬是有一番寄望，而從備戰過程中，「甜統」確實流露不俗水準，據馬房手足所述，呢隻「甜統」多數由有經驗騎馬人尹志傑操練，每次操畢呢隻馬，傑仔都話「甜統」非常好火，要出盡全身陰力去拉實隻馬，所以尹志傑指操一隻「甜統」，等於操兩隻馬嘅力量，由呢個評價可以見到「甜統」呢次列陣，真係唔嘢少。假如呢隻「甜統」季初有多少火氣，相信陣上前跟能力會更好，屆時搏殺起來，早段唔會太被動，今次由雷神壓陣，呢位仁兄向來喜歡向難度挑戰，「甜統」除布文贏過外，未有人再跑得好，呢個挑戰，雷神肯定會悉力以赴，替呢隻馬打破悶局。