有三位香港騎師呢個暑期到日本上陣，成績最好當然係雷神，創出一日贏六場紀錄，而韋達及田泰安成績雖然一般，但都有馬贏，由此可見呢三位騎師始終具有相當身手，因為要喺日本贏馬，冇人事冇支持真係分分鐘食白果，好似田泰安咁，喺日本客串資歷冇乜，韋達都叫常客，有唔少日本練馬師識得佢，田泰安是毛里求斯騎師，如果唔係香港騎師，真係好難到日本上陣，但點都好，憑佢嘅努力都有馬贏出，相信下次有機會再到日本，一定會再有支持。講努力，佢返香港之後，經常足不出戶，佢同相熟練馬師講，如果要幫手，可以立刻俾電話佢，佢即刻會喺宿舍飛落馬房幫手。苗禮德係佢第一個送秋波嘅馬房，知道呢位騎師有咁嘅心，老苗當然暗暗歡喜，所以呢次老苗批馬，除大部分預愛將嘉琦之外，田少亦執到幾隻實力馬，例如「威德將軍」、「金太陽」及「世界紀錄」。老苗知道田泰安冇嘢做會留喺宿舍，就經常搵佢入倉互相交流意見，喺呢三隻馬中，田泰安俾得意見最多係「威德將軍」，呢隻馬上季尾跑場千四米得第三名，開始有啲走勢，其實呢隻馬落到五班有多少着數，上季由雷景勳入位一仗，屬轉入苗廄首戰，新接手練馬師可以一早摸到操練呢隻馬嘅竅門，都咪話練馬師唔重視，呢次馬房搵田泰安，唔係用愛將蔣嘉琦，當然知道要贏呢隻馬有些少難度，因為要後上衝一段，所以用硬功騎師田泰安，合晒馬房出擊路數。