■馬明不想一年放十多個月在內地工作。香港文匯報訊（記者 梁靜儀）馬國明繼去年的台慶劇《梟雄》之後，相隔多時才再有新劇《為食神探》推出。近年無綫多位小生相繼離巢，繼鄭嘉穎後，盛傳明年初約滿的黃宗澤亦不會續約往內地發展賺人仔，之前盛傳馬明拒與公司簽長約而遭雪藏，問到與無綫的合約進展？他透露將會續約：「都差唔多搞清楚，好多條件都傾好晒，新約將會生效。」
馬明是內地公司羅致對象，不過他卻選擇留港發展，並未羨慕往內地發展的藝人個個賺到盤滿缽滿，他說：「新約自由度大好多，呢張約幾啱我，始終父母喺香港，年紀都大，如果要我一年放十多個月喺上面，我又唔係太想，當然之前有內地公司搵我，開出條件係好嘅，但頭三年要好長時間喺內地。」他又笑言父母不會擔心他的事業發展，只會擔心沒錢用。問到不是擔心他還未成家立室嗎？他說：「父母從來都冇催我結婚，自己真係唔心急。」
與唐詩詠以契哥契妹相稱的馬明，因之前與詩詠傳出緋聞，令女方男友洪永城提出同居以趕絕他？馬明表示沒有看過報道，並教男方杜絕異性的方法：「要趕絕就唔使同居嘅，對詩詠好好就可趕絕晒追求詩詠嘅人，最緊要佢對詩詠好。」曾與圈中人拍拖的馬明卻認為圈內圈外都沒所謂，最重要是夾到。娛樂圈很多戀情見光死，曾被拍到與寰宇小花徐佳琦同車，因而傳出緋聞的的馬明亦有同感：「無理由第一次約會就約返屋企咩？有機會當然會食飯睇戲，但好容易畀人影到，可能大家連手都未拖，都係食飯傾偈階段，但傳媒又好心急，一寫就話拍拖半年，好可能嚇親個女仔。嚇親個女仔都唔緊張，女方會明白，但會嚇親人哋父母就麻煩啲，認為感情穩定先公開比較好。」
自認悶蛋 想女友深閨
有「筍盤」之稱的馬明，認為是大家畀面，其實在很多女仔眼中他是悶蛋一個。問到現時可有意中人？馬明自爆：「我一路開工一路睇緊，但好多都封咗盤，譬如《為》劇的香香、翠如都封咗盤，（黃心穎？）可以諗吓，（江欣燕呢？）江欣燕好好，我都鍾意。」談到擇偶條件，他強調：「年紀不是問題，最重要溝通到，（父女戀？）太細未必得，好難溝通，我係幾悶嘅人，如果對方太貪玩，自己又鍾意喺屋企咁就好難溝通，如果另一半都深閨就好，囉唆啲都唔介意。」