今晚跑馬地重燃戰火，以C欄C加3跑道作賽，頭場下午七時十五分開跑，三T有逾一千七百萬多寶，六寶獎有一百五十多萬累積，第一口孖T亦有八十多萬多寶。馬房方面，沈集成、姚本輝及蔡約翰均可睇實，而騎師方面，潘頓剛周日食出大四喜氣勢鼎盛，值得重視，另外羅理雅手執不少實力馬，亦要留神。
第一場、第四班、一八○○米。「金龍」前季初出跑田草直路賽，後上得季軍；上季首戰出爭田草千四米後上如箭掄元，兩季初出不勝有位，看來喜歡跑新鮮，再翻查此駒去季跑過四場四班賽，得兩冠一季一殿，反映在四班競爭力頗強，上回初出田草一哩後上不及跑第四，今次練者打王牌渡江增程千八，顯然必有的放矢。
第二場、第五班、一八○○米。「鼓浪飛星」（圖前駒）死步頭均速中長途馬，性能如廄侶「包裝騎士」，呢類均速馬放唔出的話通常演出都會一塌糊塗，輸到無影無蹤，未有展露真正實力。正如上仗初出爭谷草一哩，寶遜醒目中段踩油擺前走，最後頂返一席冷Q位，拚後狀態仍堪持續，今仗跑番千八勝途排三檔，當具取勝資格。
第三場、第四班、一二○○米。「勝利名星」上季一再熱倒因為當時三歲尚未成熟，但今季踏入四歲必可展現真面目，剛賽前試閘輕鬆勝出，足以顯示進度有多好，結果上回渡江角逐千二米，在潘頓胯下以輕鬆姿態後上開胡，視一眾四班馬如無物，拚後加七分仍留四班，添食冇難度。
第四場、第四班、一六五○米。「隨時候命」睇血統是早熟種，同父馬「君子協定」便早於首季贏馬，再追溯至更早一批已退役同父馬，「紅衣叻叻」、「開心歡笑」亦同屬早熟急先鋒，相隔多年來到「隨時候命」身上，踏入五歲豐盛期，剛戰初出谷草千二跑第七，拉士追勢不弱，省過開氣今次小方安排增程一哩出擊，看部署應是見真章時候。
第五場、第四班、一二○○米。「秘密武器」蔡廄質新老虎，上季五戰新馬班跑獲一亞三季一殿軍，獲亞一役乃出戰田草千二及佔得內檔之利，歇暑後打仔馬操練循序漸進，埋門由柏寶試泥閘，以按韁姿勢走來步伐洶湧有力，今仗初次渡江爭千二，如合跑窄場當可贏馬作出交代。
陀飛輪熱身後到位
第六場、第三班、一二○○米。「陀飛輪」自上季初晨課弄傷腳後，經過一段時間休養，季尾操練與進度一切回復正常，表現迅速納回軌道，並且一再克服劣勢於同程交出一冠兩殿軍，出色谷草性能盡顯露無遺；今季難得仍能承接上季勢頭，剛戰初出谷草千二，排外檔起步走中疊車前倒後敗近，經熱身捲土重來再戰，當屬爭勝分子。
第七場、第三班、一二○○米。「誠信寶駒」上季初只能間中在中距離賽入位，表面看實力漸見盡，於三班並冇優勢，但於二月份跑田草千四米得接近之殿軍，正是跟「幸運歡笑」跑近；翌仗轉到窄場跑千二米，即在嘉琦妹胯下搶放爆出九倍半冷W，可見避開一批沙田惡馬而轉攻窄場能夠提升競爭力，今次初出此程隨時再施殺着。
發明小子再創高峰
第八場、第三班、一六五○米。「發明小子」九百九十幾磅馬仔上季初因為身瘦關係難以迫起狀態，直到季尾階段轉戰谷草一哩便試出彩虹，一口氣連下兩城，底厚馬進度已踏上正軌，預計季內戰鬥數值必會持續上升，目前評六十九分尚有不少虛分未兌現，仍喺三班再戰一哩勝途，今回抽到六檔起步有利，有力締造跨季三連捷佳績。