■獨琦與李柱銘返港大出席晚宴。 fb圖片「本土民主前線」發言人獨琦（梁天琦）無得選，寧願幫「青山新症（青年新政）」，都唔幫同屬激進陣營的「熱普城」，最後搞到「熱普城」輸到要解散。一眾「熱狗」記仇記到今日，仲小氣過方丈。獨琦前晚返港大出席High Table Dinner（高桌晚宴），「熱狗」見到「港大」兩個字，加上同場仲有創立民主黨的「禍港四人幫」一員李柱銘（馬丁），自然要大肆攻擊，但大多不離批評獨琦反骨、變臉等。
狂洗版批恩將仇報
港大利瑪竇堂前晚邀請獨琦同李柱銘出席High Table Dinner，兩個Ricci仔（利瑪竇堂宿生），一個是「本土派」，一個創立被揶揄為「左膠」的民主黨，坐埋一枱大談對目前政治形勢的看法同分析。獨琦在晚宴後懷緬過去常陶醉，更在facebook上載一張大合照，仲話「重回Ricci Hall出席High Table Dinner，感覺有如時光倒流」。多名「港大幫」如港大學生會前會長馮敬恩，同與《輔仁媒體》總編容癌（容樂其）友好、港大畢業的方學能都讚好。
「港大幫」在選舉期間睇獨琦頭支持「青症」，搞到成班「熱狗」見到「港大」兩個字即刻眼火爆，在獨琦facebook留言洗版。有人直言獨琦係有風駛盡??的世界仔，有人就仲記住獨琦未紅時，「熱狗」點幫佢，批評獨琦恩將仇報；更有「熱狗」稱李柱銘曾是香港基本法草委，既然獨琦同李柱銘坐埋一枱，「不如全體唱首《熱愛基本法》啦。」
支持獨琦的作家健吾睇唔過眼，在其facebook分享獨琦的帖文，提醒一眾「熱狗」打手要起身開工：「嘩！仲唔係罪證，快啲看圖作文。」 ■記者 陳庭佳