■宅滔自爆俾司徒子朗淋烏龍茶。 fb圖片「東九龍社區關注組」發言人宅滔（陳澤滔）早前約「愛港之聲」主席高達斌燒烤，諗住選完嚟一個電視劇式大團圓結局，點知燒着「熱普城」及其他「本土派」中人，到𠵱家都未狙擊完。宅滔亦唔服輸，日前就在facebook上挑機，俾埋時間、地點叫人狙擊自己，結果就俾學聯前常委、曾任「熱普城」「教主」黃毓民助理的司徒子朗電視劇式潑茶。有宅滔支持者批評淋茶等同普通襲擊，但有高登仔覺得宅滔「大愛」到連高達斌都有偈傾，「乜（𠵱）家俾人淋吓茶咁都嬲。」
滔粉批司徒子朗「普通襲擊」
宅滔前日在fb發帖，話自己「俾人淋津路（烏龍茶），哭哭」，有網民問到是否司徒子朗所為，宅滔反問「仲有邊個」，更稱，司徒子朗好似有飲過該瓶烏龍茶。有宅滔支持者直言，如果司徒子朗淋中宅滔，可構成普通襲擊，應該報警處理。更有人批評司徒子朗如果要勇武，就應該淋反「佔領」的高達斌，質疑佢欺善怕惡。高登討論區也有巴打討論事件，但質疑宅滔偽善，「陳澤滔咁大愛連高達斌都可以一齊BBQ，𠵱家俾人吓津路咁都嬲。」
司徒子朗一直唔妥宅滔約高達斌燒烤，事後連發多帖炮轟宅滔「通匪」，更露骨到連宅滔爹娘都問候。佢前日去宅滔fb踩場，無否認淋茶一事，反而不斷留言要宅滔「同抗爭者道歉」，並上載自己帖文截圖及宅滔同高達斌的合照。「滔粉」亦紛紛反擊，着司徒子朗「同支津路道歉」。
網民疑「教主」或羅三七有關
另外，司徒子朗幫過黃毓民做政策研究助理，之後卻隨學聯積極參與「佔領」，去年同羅三七（羅冠聰）爭做學聯秘書長不成。立法會選舉期間，司徒子朗在港島區寧願支持羅三七，都唔撐「教主」欽點的四眼（鄭錦滿），卻同時分享「教主」的帖子，真係唔知佢開邊瓣。有網民問到事件與「教主」定係羅三七有關，宅滔稱「今日（前日）見到羅冠聰，佢話唔關佢事吖」。
宅滔今次被淋烏龍茶，其實多少有點咎由自取。佢大前日在fb下戰書，提到佢出席活動的時間、地點，仲講到「有人話要我去公開場合狙擊我，咁就啱啦，星期六佐敦見。」結果𠵱頭講完，嗰頭咪見囉！
■記者 陳庭佳