蔡神仙有唔少馬真係要搵雷神先至有得贏，不過，有時蔡神仙都會刻意用其他騎師，唔同類型馬，佢會用唔同好手跑，好似早前食完詐糊嘅「翩翩」，雖然雷神同隻馬彈過大閘，到頭來策騎權依然係潘頓，雷神冇得沾手。又例如上季跑得好出色嘅「東方快車」，上季係由田泰安操刀，殺到入打吡一樣用番佢，事關蔡約翰認為邊個騎師騎得最好就用邊個，唔理呢位騎師大名氣或小名氣。不過，呢季「東方快車」易咗手，由田泰安轉咗雷神，原來幕後對田泰安上季有一場半場表現唔係咁滿意，由於雷神名氣關係，希望呢隻馬由莫雷拉壓陣，睇下有冇可能會交出再進一步成績。一隻馬想更上一層樓，作些少轉變亦無可厚非，呢種調動大家都可以理解。
今次田泰安本來有隻「首映」騎開，而隻初出馬「爭分奪秒」賽前亦係由田泰安操開，後者最初由楊明綸彈過兩課大閘，展現飛快前速，第二課試泥地千二米，即得第二名，但早排因楊明綸傷患關係，要休養，蔡約翰將隻馬交由田泰安操，上個禮拜二，倉主安排田泰安替隻馬彈課千二米泥地大閘，以一放到底姿態輕勝而回，贏第二名「南方快車」兩個幾馬位，姿態輕鬆程度令人眼前一亮，而「南方快車」呢課閘係由莫雷拉考驗，點知彈完呢課大閘，雷神即向蔡約翰索騎「爭分奪秒」。
雷神開到口搵蔡約翰要騎隻「爭分奪秒」，田泰安只好拱手相讓，今次雖然隻馬排十四檔，但幕後認為隻馬超班，點都有得跑，可能仲因為排十四檔關係，臨場分多兩蚊。消息所指，踏入十一月份，亦係蔡約翰馬房開始策動攻勢時候，呢個總攻勢一直會持續到跑國際賽，即十二月份左右，而呢類質新馬將會配合出擊，所以今次「爭分奪秒」大有機會喺大賽日子攞威。