「巴基之星」呢次喺第十場列後備一，點解有咁嘅情況出現，假如馬房肯用王牌，點都有正選做，呢個問題，只有告東尼先至可以答到大家，下次當正選相信就會有答案。從告東尼冇替呢隻明星馬用王牌，就知道呢次兩隻用王牌報名馬一定有料到，至於呢次日馬，邊兩隻用咗「巴基之星」張王牌咁有分量呢，一隻係初出馬「帝豪寶寶」，另一隻係第五班馬「銀影大亨」。「帝豪寶寶」用王牌唔出奇，可能真係可以一出即勝。但五班賽隻「銀影大亨」可以令倉主落張王牌俾佢作正選自然唔簡單。講真隻馬今次出戰第五班千四米路程，過往跑過三次屬三零部隊，真係連一場位置都未跑入過，但大家細心睇一睇，近兩場谷草一哩「銀影大亨」跑得唔算差，證明狀態有番咁上下，呢次所跑田草千四米，曾經試過有次跑四班賽，當時跑入一席第七名，輸三個半馬位俾頭馬「翔惑」，咁即係講，只要佢有少少進步，落到第五班上陣，經已有迴旋之力，再睇宜家好多倉養馬數目都接近爆棚，因為每個倉只准養六十隻馬，不過，可以走法律罅，擺兩隻喺雙魚河養草，呢兩隻名額唔計數。所以，唔少倉都會刻意掃走啲低班馬，騰出空馬格，迎接一啲質新份子加盟，告東尼亦受緊爆倉之苦，不過佢就留番一隻五班喺度，呢隻就係「銀影大亨」，所以話呢隻馬季內冇馬贏，真係講都冇人信，呢次用到客串騎師韋紀力執韁，肯定會鍊到盡，應該可以見到隻馬真正威力嗰一面。