■龔嘉欣表示這一刻選擇把事業放第一位。為演喊戲 片場收埋自己
龔嘉欣(Katy)在《幕後玩家》演賢妻思汝一角，卻遭老公黃宗澤（Bosco）有婚外情而拋棄，早前播出一幕爆喊場面得到觀眾同情，不少網民力推她下月奪最佳女配角。其實除了早前悲慘一幕外，本星期「世紀賤男」黃宗澤會回來跟她爭女兒撫養權，令Katy「終極崩潰戲」變癲，各位觀眾要攞定大量紙巾傍身了。
龔嘉欣一向演開純情少女，今次忽然一改戲路演慈母，早前「老公」黃宗澤向她攤牌，龔嘉欣憑「爆喊戲」獲網民大讚「世界級演技」，更推舉她攞今年女配角。其實唔講唔知，今次龔嘉欣是臨危受命接拍這悲情角色，為了拍好喊戲，嘉欣平時在片場寧願收埋自己，以免被其他人影響自己情緒。
「嗰場戲拍得好辛苦，流眼淚唔難，但要感動人就好難。Bosco同張繼聰幫咗我好多，因為大家都好投入去拍。平時我在片場會嘻嘻哈哈，但今次呢個是臨危受命去接呢個戲，接的時候好急，所以單是睇戲本已經用了很多心機。拍的時候又唔敢同別人傾偈，怕影響自己情緒。早前播出時，睇返都好心痛。來緊仲有一幕，Bosco會跟我爭女兒撫養權，由於是戶外取景，導演要求多角度拍攝，結果拍了幾次，又喊了幾次，雙眼都喊到腫，回到家中雙眼仍紅，喊到好似自己真係經歷咗咁。」
「人言可畏」不再忍
只得26歲的龔嘉欣今次「升呢」做慈母，和6歲的囡囡演對手戲，絕對沒難度。和前男友鄧健泓分手後，龔嘉欣呢幾年爛桃花甚旺，更不時被標上「小三」代號，一時又話佢疑似介入吳業坤（ 坤哥）與王卓淇的戀情，一時又話佢疑似介入袁偉豪和岑杏賢的「分」訊，幸獲當事人出面澄清。但「人言可畏」，龔嘉欣決定以後遇上這些失實的報道，不再選擇沉默。
「人言可畏，當初我選擇沉默係因為想大事化小，但原來大家會選擇相信，咁以後就算我講一萬句，你們都唔會相信我。特別是坤哥單嘢，睇到新聞的時候都幾激動，嗰個女仔（王卓淇）根本是不認識的，憑咩在傳媒面前亂講說話，係有唔開心，因為真係唔關我事。我都曾同律師傾過，想告她。幸好坤哥有幫我澄清，可能娛樂圈很少像我這個年紀的女仔是單身，而且我多數與男拍檔合作，有感情線，變成一定會傳緋聞，很正常的，只是不能太過分，認識我的人都知道，我不是一個嗲聲嗲氣的女仔。」
拍拖一事放第二位
與其被人隨便安個「男朋友」，倒不如正正經經找個男朋友拍拖。記者笑言其同居密友姚子羚都已經和有米男友鄭子邦打得火熱，隨時飛甩嘉欣。說到拍拖一事，嘉欣坦言因為上一段情傷害得自己好緊要，所以拍拖此事對她來說頗為遙遠。「我份人很順其自然，我覺得所有事情都是安排好了的，由不得你去想。我要搵個男朋友，而因為我想下一個男朋友就係我結婚的對象，所以要時間了解咗之後先結婚，結完婚又想過吓少少二人世界先再有個小朋友，所以好遠啦！現時未有心拍拖，因為之前一段情好傷害我，每一個人在不同階段的優先順序也會有分別，在這一刻毫無顧慮地選擇事業放首位。」