今晚谷草安排九場賽事，以B欄C彎跑道作賽，一年一度國際賽盛事展開序幕，今次舉行四場國際騎師錦標賽可觀性甚強，頭場提前至下午六時三十時開跑。練馬師方面，蔡約翰及文家良皆派出不少實力馬，可優先留意。騎師方面，雷神及潘頓手馬甚具競爭力，要吼實。
第一場、第五班、一六五○米。「勁駿皇駒」上季中在五班千二打開勝門，蹄下敗將「盈喜悅」及「牛魔王」其後均交出頭馬，確認本身在五班具爭勝本錢。再看上月中出爭谷中短途，在韋達胯下力拚梗頸，而上季贏馬前一役亦係跑第四，慎防今仗增程出擊放冷箭。
第二場、第三班、一○○○米。「實力飛駒」乃谷中一千專家，上季跑過四次，交出兩冠兩亞佳績未失前兩名，路程能力極之出眾；上仗今季初出喺此程大熱門一氣放返，拚後加六分仍爭三班，埋門試閘走勢一氣呵成，交出水準添食唔難。
第三場、第三班、一二○○米。「嫡愛寶」挾着上季四戰得兩冠一亞成績來到今季作賽，四歲大熟大勇馬註定成為馬迷的焦點，首仗出爭田草千二遇上星級戰將「京京千里」，結果只跑第四；上仗大熱門卻喺直路未能加速再次熱倒跑第五，打仔馬拚後狀態持續提升，埋門雷神試泥閘走勢強勁，今次轉戰窄場，爭勝機會當值得睇好。
第四場、第四班、一○○○米。「首映」三歲仔年紀輕輕，今季三戰的成績已不俗，初出直路賽跑獲第二名，次仗在同一路程得第四名，上回再爭不敵大勇大熟「祥勝駿駒」力戰入Q非戰之罪，也證明本身具有一定的能力，並且極之早熟，在四班隨時可以呼風喚雨，今次練者入紙出戰窄場一千，環看對手實力參差，如合發揮勝望高唱。
第五場、第四班、一六五○米。「紫電明珠」六歲仔今季猶如踏上第二春，季內五戰已連續三場跑入亞席，而服役以來累積三冠九亞六季成績，既然對上三戰同程均入Q，演出準繩，向來好開繼續好，跑法主動是優點所在，今晚抽到鄭朗升執韁更有助進取，可望取到季內首W。
第六場、第四班、一二○○米。「綠茵風采」在港出賽兩季，兩勝均在谷草千二米獲得，今季初出由於未熱身，如果立即跑勝途，恐怕貫注力未足難以捱到尾，所以初出憑新鮮感縮程跑一千米，亦屬可取的選擇，該役配雷神喜獲一檔之利，結果力拚下僅負於超班馬「翩翩」無話可說，今回強敵已去，復爭千二勝途，爭勝機會樂觀。
第七場、第四班、一六五○米。「奇真」上季評六十四和六十五分時於三班與「鈦金剛」及「勢必跑」串Q，如把賽績套落今組四班賽，計級數何止高出一皮，儘管昔日評分處高點時，谷草戰績欠睇頭，惟現時落到四班總應該持不同計法；上回渡江爭一哩強配雷神入Q，捲土重來是有補中之力。
第八場、第三班、一六五○米。「美麗鉅星」前賽此程克服慢步速衝入季軍，拉士締速快至廿二秒四九，追勁強橫，所克服難度更勝頭馬「僥倖」之上；汲取經驗後不斷進步，上仗潘頓再跑已發揮水準，可惜鬥拉士冷不防「勁嘉輝」喺內欄竄上未竟全功，今次趁勇再戰谷草一哩必全力補飛。
第九場、第二班 、一八○○米。「瑰麗傳奇」上季三戰全部在田草大敗而回，甚至今季初出一役同樣無甚表現，但到前仗初跑谷草千八，配何澤堯也捧成大熱，結果前中段留後跑，入彎又見內閃難以抽出外疊，最終姍姍來遲追獲亞軍；上仗由雷神接手，沿途留後，入直路一俾即開摩打腳彈甩群駒補中，今次續攻勝途有力添食。