上個禮拜六韋達應邀出戰西澳洲雅士閣馬場角逐一級賽千八米，佢騎隻Scales of Justice，直路透出之後，諗住以勁勢過終點，但終點前一步韋達停止推騎，而呢個時候澳洲仔連達文騎隻「高層明星」死纏爛打，點知就喺韋達終點前停手推騎一刻，搞到韋達影相飲恨得亞軍，賽後韋達話睇錯終點，當地馬會高層要另定日期研訊。其實，翻睇呢次輸馬條片，無疑終點前佢過早停止催策，但唔覺得佢會睇錯終點，事關佢貼住條欄跑，終點線位基本上就喺妏j離，假如咁都睇錯，咁就真係要驗吓對眼。點解佢咁早停手？有心水清人士分析，主要係佢體能唔夠，宜家韋達四十幾歲，舟車勞頓影響體力之外，跑千八米一級賽，大家馬匹實力相近，唔拚到最後一口氣都唔得，韋達全程留放跑到一絕，只係輸收尾呢步，可以話人算不如天算，大家如果有睇呢條片，韋達俾連達文過咗之後，仲好狼狽咁騎番幾步，好可惜嗰陣時經已過晒終點，啲人咪以為佢睇錯終點囉。
講睇錯終點，柏寶同樣有類似鏡頭，不過佢冇大意輸馬，卻係真真正正輸馬，呢次就發生喺本地賽「太陽喜喜」身上，上次跑田草千六米，柏寶騎「太陽喜喜」末段透出之後，鞍上人集中注意力，力拒外檔隻「縱橫大地」衝刺，終點一刻佢真係鍊贏咗「縱橫大地」，但企身歡呼之際，原來冷不提防由祈普敦所騎之「勢必跑」已從內欄竄上，終點前一齊叮噹影相，結果影贏埋，呢鋪柏寶可以話瘀到爆。
賀賢對柏寶上次贏唔到「太陽喜喜」都有啲微言，近日賀賢對今次夜賽戰馬「太陽喜喜」及「歡悅星」（圖2號）非常緊張，周一排位朝大約五點半，佢專登安排呢兩隻馬喺沙圈地堂拍踱，「歡悅星」由副練李兆錚主持，「太陽喜喜」則由馬房經驗騎馬人劉家泰試，賀賢在場親自監督，兩隻馬下午再被安排游水及照燈。「太陽喜喜」今次競逐谷草千八，倉主好有信心隻馬能夠應付，至於「歡悅星」上次得第三輸俾「威風霸皇」及「確威龍」，今次倉主再俾機會柏寶，希望騎者醒定啲，可以替呢兩隻馬贏馬補鑊。
瑰麗傳奇方仔緊張
方嘉柏近日好緊張「齊齊健康」同「瑰麗傳奇」，近兩日均見佢親自喺機坪睇兩駒拍踱。「齊齊健康」近兩仗由雷神取得一冠一季，今次雷神雖然唔騎而換上何澤堯操刀，但馬房認為匹馬狀態冇問題，仍具三甲本錢。至於「瑰麗傳奇」上次由雷神贏完，今次一樣由佢騎番，且續跑贏馬路程谷草千八米，其實，方仔有問過幕後會唔會將呢隻馬轉去大場上陣，或有意出戰一啲大錦標場合，結果所得到答案，只係順其自然，而經幕後客觀分析，如果跑大場，多數會遇到大摩及老蔡嘅惡馬，所以都係留守跑馬地，等分數進一步調升，再無適合賽事才部署出沙田。而「瑰麗傳奇」過往一對前腳有過疏仙毛病，所以馬房好小心咁處理，要經常打水腳包治理。今次賽前準備，除操練認真外，亦都搵埋獸醫檢查清楚雙腳健康狀況，據知一切良好，現時經已唔使打水腳包，尾場「瑰麗傳奇」隨時同「太陽喜喜」串Q返來，不妨一試。