■現實中的李漫芬既勤力又慳家。無綫熱播劇《致命復活》近日掀起全城估兇手行動，除幾位主角外，演郭晉安大嫂的李漫芬（Fanny）飾演一個極勢利的貪錢女人，說話又尖酸刻薄，被網民封其角色為新一代「八婆兼貪錢之霸」。Fanny接受本報專訪時表示，當初接到這個角色，早預觀眾出街時的反應甚大，劇中「叔仔」郭晉安更封她為「新一代八婆」。前主播李漫芬加入TVB這個大家庭已有十年時間，以前做無綫娛樂新聞台主播一職時，亦不時客串劇集，最近Fanny轉了做合約演員，她表示好多謝監製林志華找自己演出，Fanny說：「以前為屋企，所以要有一份穩定的收入去支持自己，我在TVB娛樂台工作了接近十年，好多謝公司對我的信任，好多大騷，國際巨星我都訪問過。現在自己覺得是時候去尋找一個當年的夢想，希望成為一個演員。像今次演古明華的太太，劇中成日蝦安仔及蚊蚊（萬綺雯），乜都以錢行先的貪錢女人，講嘢又尖酸刻薄。拍的時候都好驚自己會過咗火位，但安仔同古佬都叫我盡情咁去罵，拍完後『叔仔』仲周圍話我可成為新一代『八婆』，以後啲八婆戲找Fanny演就冇問題，我好多謝安仔。同時我要多謝公司戲劇部監製，因為有時拍劇，佢哋體恤我做主播、 司儀工作繁忙，而對我作出包容。做演員好多嘢要學，同不同的演員合作，都學到嘢。而且TVB這個平台真係好大，像之前播《一屋老友記》，大家出街都會熱情地叫我做川嫂，又會有內地商演，係專登找韋家雄同我以川叔川嫂的情侶檔去登台。」
現實慳家孭起頭家
劇中李漫芬是個貪錢的女人，但現實中Fanny其實是個勤力又慳家的人，記者早年跟她相識於她做模特兒的年代，可以帶埋飯去戲樓邊吃邊等化妝埋位。如此節省，而且工作幾乎全年無休，既參與劇集、客串電影又擔任活動司儀，只因為當年要擔起頭家，照顧生病的爸爸。「我鍾意演戲又鍾意主持，有人讚過我『執生』成功，雖然我冇靚樣，但上天係公平的，佢賜我另一方面的天分。」Fanny訪問過不少名人紅星，大導演，更在個人節目《導演訪談》成功與洪金寶、劉偉強、石天及彭順等名導做訪問，她說：「以前讀導演課程，志偉睇住我入行，佢好照顧我這些新人。 」
邂逅未婚夫勁有緣
明年Fanny將和圈外未婚夫Alvin（談成坤）結婚，原來二人的相識經過勁有緣，Fanny說：「之前我為一個婚宴做司儀，本來去唔到，後尾去得成，本來安排我坐另一枱，後尾調去坐Alvin嗰枱，而佢原本係唔去，後來改變決定，都可以話幾有緣。未婚夫教游泳，好勤力的，而且好有義氣。當日未拍拖，佢知道我被前業主迫遷，二話不說就過來幫我搬屋。見我一個女仔，新屋好多水電都未得，又立即幫我整，令我產生好感。好多謝上天讓我認識到佢，佢媽媽也好錫我，知道我工作忙食無定時，常煲靚湯畀我飲。」■採、攝：植毅儀／化妝、髮型：Trista Makeup／場地：ChongMakeup