■王君馨表示創業初期遇到不少問題，但也在學習過程中成長不少。香薰首飾靠好姊妹做人肉「生招牌」
藝人王君馨（Grace）去年憑「花曼」一角大獲好評，人氣急升，橫掃各大頒獎禮。醉心演藝工作，但仍不忘創業，去年推出自家香薰首飾品牌DearestGrace，開業後於短時間內極速回本賺番六位數投資額！除了香港市場外，前日情人節，Grace赴馬來西亞，為在當地開的第三間首飾店剪綵。問到生意心得，Grace謂自己的香薰飾物主打平民路線，價錢亦相當「貼地」，僅花幾百元已能買下心頭好，大家都開心! 採、攝：植毅儀
醉心演藝工作的王君馨，仍不忘創業。去年和飾物設計師Bell Kwan合作，設計飾物。由網店開始，做到現於上環有樓上舖。開業後於短時間內極速回本賺番六位數投資額，只因Grace創意多多。
「大學時我讀企業管理，又好鍾意做藝術嘢，所以就設計手作香薰首飾。去年成立香薰首飾品牌DearestGrace，同飾物設計師Bell合作，投資六位數字成立品牌。飾物配搭精油，當中的項鏈、耳環及手鏈等特點在於銅製的開合吊墜中可放入滴有香薰精油的棉花球，令香氣從飾物中散發及產生寧神安心之效。香港的租金始終好貴，籌備一個月就擺上網賣，所以創業初期我們以網店為主。但生意比預期的好，開賣頭一個月已經賺番唔止六位數，因此就在上環開了樓上舖，有屬於自己的showroom。」
情人節大馬再開實體店
Grace除了自己做生招牌外，「處女黨」的好姊妹如岑麗香、苟芸慧、李亞男及鍾嘉欣，以及好姊妹鄧紫棋也成為飾物的「生招牌」。而呢大班好姊妹也成為Grace的創作靈感，如早前為鄧紫棋創作「Morning Star」系列，也食住去年「花曼」熱潮，推出首飾系列「蝶戀」，以紀念劇中花曼與牙佬真摯的愛情。剛過去的情人節，又和雪糕品牌合作，推出香水蛋糕，認真有諗頭。
「創作靈感始於『Amazing Esther』的好姊妹，起初只想為她們送上情人節禮物而已，旗下的Angel（天使）、Princess（公主）、Goddess（女神）、Queen（王后）、Warrior（戰士）飾物系列各自代表姊妹及自己。好多謝她們，因為她們是我的靈感泉源。李亞男代表Angel，她就是個好照顧你的Angel。鍾嘉欣就係非常靚的Goddess。香香代表Princess，佢份人好sweet同好可愛。至於苟芸慧就是Queen，佢好有氣質同貴氣！我就係Warrior，從來唔係咩女神或者BB，我鍾意努力去Fighting。雖然飾物定價只是幾百元，生意遠比想像中好。特別是《城寨》播出後銷量高咗好多，除咗香港同內地，東南亞、歐美、澳洲都有唔少客人，尤其大馬最多，所以除咗本身香港有舖，大馬也開了實體店，而且已經是第3間，預計半年內會在馬來西亞開五間店舖。我好感恩有一班朋友幫手同畀意見，開頭都擔心過自己眼光，但反應咁好，自信都多咗。」
親自穿珠當減壓
開業即賺第一桶金，Grace稱會不斷擴展其飾物Collection繼續「吸客」。諗頭多多的Grace更計劃與其他藝人好友舉辦聯乘Pop Up Store及開設顧客手工班，強勢宣傳自家飾物。回想起創業初也遇到不少問題，令其大亂陣腳，幸好在失敗中學習，令Grace於挫折中成長。咪以為Grace識講唔識做，只要唔使拍劇的日子，Grace直言最愛匿埋工作室設計及製作自家品牌的首飾，笑稱有減壓作用。一個人坐低專心逐粒穿珠仔，過程好relax。
「有人試戴後敏感或甩色，我即刻免費退番畀佢。又攞成批貨去鍍晒K金成分，等批首飾唔再易甩色同敏感。跟住諗住整首飾生意成本少，但之後要一批一批咁買材料就狂加成本，幸好一切已經雨過天晴。我用的水晶珠全部都是Swarovski，雖然好揼本但係值得，贏是贏回口碑。我唔需要賣到幾千、幾萬蚊一條鏈。大家戴得開心同靚，又令自己精神啲同舒服些，就已經好好，幾百元已能買下心頭好。有時不用工作，回公司穿珠。看似簡單的工序，當中暗藏學問。唔少晶石都有分前面同後面，要睇清楚將shinny的一面向外，否則發現穿錯要從頭再做。除了我會親手做鏈外，也會外判畀家庭主婦做，希望她們在照顧自己的家庭外，也可以靠自己的勞力去賺外快。」