潘頓到目前為止經已勝出五十一場頭馬，當中有八場是出自「美麗」系，由此可見佢喺「美麗」系心目中嘅地位幾咁超然，即使雷神都唔可以代替，因此，當有「美麗」系馬出戰嘅場合，如果用其他騎師，即使用雷神都好，效果只係一般。正如今次第五場隻「美麗皇牌」，季內經已贏過兩場，經手人都係潘頓，今次列陣，只要潘頓肯騎，相信鞍上人必定係佢，但大家睇睇呢次由邊個騎，係由蔡明紹披甲，機會當然唔及得上用潘頓咁好，加上呢隻馬跑兩次谷草千二米都唔掂，相信志在減分。至於潘頓呢場就揀咗今季演出非常準繩嘅「翩翩」，事關呢隻馬今季跑四仗，取得三冠一亞成績，僅上場跑二班賽輸俾「幸運年年」，其實，呢仗潘頓跑嚟未有以往咁大信心，可能意識到有一兩隻假想敵，戰術運用同過往稍稍不同，以往取勝三仗，起步即使「翩翩」有速度，都唔會亂咁放，但上場跑二班賽，一起步未幾就佔欄領放，入到直路仲以為可以順利贏馬，誰不知遇到「幸運年年」發神威，終點前被擒下。當然，事後睇潘頓假如唔採取放鳶戰術，又是否可以喺呢場二班賽完成四連霸，呢個假設確實有咁嘅可能。馬房唔想「翩翩」喺田草再遇潛龍伏虎，於是安排隻馬回師角逐跑馬地賽事，一般情況跑馬地嘅對手會比起田草弱，而馬房希望趁「翩翩」狀態在巔峰水準繼續數胡。為穩陣起見，賽前仲安排由潘頓親自彈一課泥地大閘才派上戰場，呢課泥地大閘安排喺上周二由潘頓親試，起步即應聲彈出，潘頓按實韁繩，就此一放到底勝出，跟隨第二位嘅「綠茵風采」，鞍上人全程逼住胯下坐騎想威脅「翩翩」卻未能得逞，由此可知「翩翩」近況何其勇，今次潘頓棄「美麗皇牌」，揀呢隻季內長期有佳態嘅馬跑，實在是明智之舉。