告達理上月底勝出「你知我意」，到目前為止僅得四場頭馬，頭三場是由雷神建功，而呢四場頭馬全部係大熱門，所以呢個倉要搏嘅馬必定台前幕後都信心十足。在未用祈普敦贏「你知我意」前，告達理十分倚重雷神，但用過祈普敦，原來身手亦有番咁上下，近期立即加強合作，不過就未有進一步成績交出。馬房處境惡劣，好多時候都搵唔到大師傅幫手，好似今次跑第六場四班千二米隻「勁兔皇」，季內三次由蔣嘉琦披甲，可惜嘉琦妹唔爭氣，一次谷草千二米輸俾「育馬妙星」屈居亞軍，另一次谷草千二米輸俾「問鼎高峰」得第二名，最近一次依然由蔣嘉琦跑，亦係谷草千二米，但三甲不入，事後睇嘉琦妹頭段搶閘麻麻，中段急忙發力搶回領先地位，但因騎上口早段做出太快步速，以致末段無以為繼。所以，基本上「勁兔皇」今季一早已備有好水準，奈何未能把握到機會，今次轉用田泰安一試，隻馬屬容易發揮嘅馬，只要搶到閘擺頭走便可安居平五路。而馬房為何要搵田泰安，其實呢個馬房都信邪，馬房一唔順嘅時候都會專登安排倉內拜神祈福，呢個舉動，早大半個月前經已試過，效果就唔係咁顯著，換人跑旗下戰馬，當然希望想沾一沾騎者旺氣，好似田泰安咁，實而不華騎師，上次日賽開始已見告廄交番馬俾佢上陣，如「神威敖翔」之流，呢隻「勁兔皇」就係咁樣嘅情況下交俾田泰安試吓，希望可以憑呢位仁兄近期手風正順替隻馬贏番場頭馬。