大摩同細摩嘅兩位公子都對賽馬有相當認識，細摩嘅公子更接替父親在澳門當上練馬師，至於大摩個仔喬治，就得老父真傳，幫馬主買馬有一手。好似上次日賽咁，「佳龍駒」贏香港經典盃及「喜旺寶」季內三捷，都係喬治入嘅貨，呢兩隻馬經已攞到打吡入場券。至於細摩個仔喺澳門當練馬師，成就雖然冇父親咁出色，但後生仔目前仍在磨練階段，不過已得到唔少澳門馬主信任，而有啲馬主，港澳聲音兩邊走，澳門有養馬之餘，香港亦有馬，所以有時香港跑馬，間中都會見到一批澳門馬圈熟口熟面嘅朋友出現。細摩個仔當然屬常客，個別馬主連香港參賽馬都托佢幫眼入貨，其中「駿皇綵」（圖前駒）就係細摩個仔嘅得意之作。呢隻馬一出即勝，用韋達有十一倍分頭，賽後有馬會工作人員訪問贏馬後心得，大摩話對呢隻馬血統認識唔深，勝出之後，佢會返去慢慢再睇呢隻馬嘅背景，咁即係講，上次「駿皇綵」能夠勝出，是隻馬有質素，二來韋達的確發揮到隻馬嘅最佳威力。從客觀因素去睇上次隻馬點贏，起步有多少前速，但跑到中段就頻頻出現內閃，韋達好鎮定，半程開始用穩韁繩工夫控制隻馬內閃，結果輕鬆贏番嚟，假如呢場幕後唔係用韋達，即使用雷神，有冇咁好效果的確係疑問，所以韋達應記首功。復課隻馬多數喺內圈踱步，操練呢方面經已足夠，最主要是改善馬匹唔規矩嘅走勢，成就相信會更上一層樓，馬房為了針對呢一點，目前替呢隻馬所報嘅路程，依然屬上次贏開嘅直路賽一千米，其實呢隻馬可以勝任千二米，因為嚟香港前，隻馬贏過千一及千二米呢兩個路程，相信贏埋今場，馬房下次搵出路，好快會見呢隻馬出戰千二米，到時大家又可見到隻馬跑千二米嘅威力，講番今場爭勝機會，對手咁弱應該可以梅開二度，值得繼續捧場。