葉楚航今季成績麻麻，連訓練質新馬都冇乜成績，好似旗下隻「翱翔萬里」，屬今季自購馬，手足睇得好高，點知季內第三次出賽就流鼻血。不過馬房上下都希望倉主有機會憑另一隻質新自購馬打翻身戰，呢隻就係出戰第八場嘅「放馬過來」。呢隻馬現時評七十分但幕後報咗打吡，如果喺三月八日前贏兩場，相信仲可以攞到入場券。而「放馬過來」近兩次配何澤堯，分別取得一亞一殿，得亞軍一次是跑千四米，而跑完呢場千四米，就增程跑千六米，呢次何澤堯唔知係咪收到上頭柯打，改變跑法，唔留而放，結果放入一席第四名，到最後唔夠一百米先至力弱，被「喜旺寶」、「南京之友」及「君臨大地」越過。大家睇一睇，能越過「放馬過來」呢三駒，均非善男信女之輩，幕後要何澤堯用放鳶戰術，大概係估到呢場要鬥後勁，有咁多好後勁惡馬，「放馬過來」未必鬥得過，希望轉變戰術，憑輕磅能偷雞成功，不過呢招偷雞唔成，反而暴露出「放馬過來」質素居三班是有超卓感。所以何澤堯跑輸呢一仗，賽後即見潘頓擸番嚟操，其實，潘頓亦一早睇到呢隻屬好馬，因為未俾何澤堯跑呢兩仗前，「放馬過來」曾經由潘頓跑過，當時係跑谷草千二米，路程唔啱，又冇乜走勢，潘頓先至冇放上心繼續替隻馬效力，今潘頓取回角逐千六米，查隻馬來港前喺愛爾蘭只跑過兩次均屬千六米路程，兩次都得第二名，今次再跑千六米，應該可以贏番場。