■黎明與嘉賓鄭秀文合唱《Prima-Donna》。彭子文 攝香港文匯報訊（記者 李思穎）黎明（Leon）前晚假中環海濱活動空間舉行一場《黎明Leon's Penguins in Live 2017》演唱會，現場1萬6千位粉絲冒寒全企位睇騷，但見到偶像現身即時暖在心頭。Leon亦為歌迷帶來驚喜，壓軸時首度以「真身明福俠」造型現身，又在伸展舞台狂奔，難得見到Leon跳脫一面，當然亦不忘「金句王」上身，Leon以「垃圾論」來提議大家要主動跟人打招呼，增添社會情懷。
雖然天氣嚴寒，Leon感激天公造美，在獻唱《相逢在雨中》 時有感而發：「有首歌應該要喺度唱，大家聽過就會聽過，知道就會知道，點解？因為個天好就我哋。」
Leon換上藍色衫在唱出《Ba Ba》前，便與在控制台上的雷頌德（Mark）作互動，Mark預告Leon準備了兩桶企鵝仔送給大家，接着Leon便與兩位戴着企鵝帽的舞蹈員邊唱歌邊拋企鵝公仔落台送給觀眾。之後Leon以黑皮褸造型現身，手上戴有發放鐳射燈的飾物，型格十足，他叫大家以掌聲鼓勵來介紹嘉賓鄭秀文（Sammi）出場，Sammi架上墨鏡以牛仔熱褲登場，完全無懼寒風，勁歌熱舞唱出《信者得救》， 繼而與Leon合唱《Prima-Donna》，台下氣氛高漲， Sammi唱畢後即落台，Leon笑說：「真的驚喜，着熱褲嚟。」
觀眾投訴視線遭遮擋
由於觀眾席有些位置離舞台較遠，加上全企位會被前面人群遮擋，現場不時傳出「睇唔到」的聲音，Leon安撫問：「係咪C區朋友聽唔到呀？」有歌迷即大叫「睇唔到」，Leon說：「可能太嘈聽唔到，得，唔好叫住，留番把聲最後一擊！」
Leon出現必有金句，這晚他便發表「垃圾論」：「你哋幾耐無丟垃圾？有無幫阿媽、鄰居丟垃圾？有無將自己垃圾放入垃圾桶？我有做到，我發現現今丟垃圾同以前好唔同，唔關錢事，關情懷事！有次我去朋友屋企，佢打算開門丟垃圾，點知好快又閂番， 問佢『點解？』佢就話『因為唔想打招呼』，之前我因工作去屋苑，發現很多人都是直行直過，以前我哋見到婆婆倒垃圾都會講聲『Hi』，現在連Hi、笑一笑都無埋，其實可以『Hi』一聲，如果對方唔睬你， 你心裡面可以有自己方法處理，當然不要講出來。如果對方好好，你便多個幫手，這是我的建議，希望有個溫暖社區，大家愛護大家多些，希望指日可待。」隨即Leon便獻唱《指日可待》。
Leon唱畢最後一首歌《Sugar in the Marmalade》後，Mark指Leon不喜歡安哥，但找來一位朋友安哥。原來Leon把在網上的「明福俠」首度現真身出場，Leon戴上紅色頭盔以明福俠身份唱 《我唔係死蠢》，為粉絲帶來無限驚喜，之後他說：「 今次無幸運大抽獎坐摩天輪，無特別禮物，你哋係咪唔投訴？ 真係唔投訴呀嘛，我衷心多謝來自唔同地方嘅朋友到來， 大家好似買彩票，如果落雨同大風，大家都會有風險，」原來Leon真金白銀買下打後兩日同場地舉行的兩場騷，邀請被抽中的粉絲睇騷，屆時Leon都會在觀眾席，企在台下與歌迷同一角度去感受，更風騷說：「是要答謝大家多年來的支持，大家幾十年朋友，唔好客氣。 祝大家有個愉快晚上。」
台上絆了絆有驚無險
Leon送上最後一首歌《我的親愛》，他說有人提議做揮手加拍一拍心口動作，不過Leon就選擇做回Sayonara o的招牌動作，歌迷不之幾受落，其間Leon行回舞台時不慎絆了 一下，幸而有驚無險，最後Leon跟大家道別，為兩小時個唱劃上圓滿句號。