到目前為止李易達馬房有十二場頭馬成績，仲差三場先至達到馬會十五場合格嘅要求，不過現時追捧呢個馬房，經已比以前容易得多，因為宜家欄邊客品題呢個馬房戰馬嘅時候，經已睇到呢個倉明刀明槍打磨，唔似以前咁，鬼鬼祟祟咁訓練馬匹。呢個倉今季部署出擊馬亦好正面，好似潘頓贏隻「越駿寶」咁，賽前喺馬匹報名時，由於報戰馬匹唔多踴躍，於是延長報名期間李廄再加報一隻「佳運來」，一隻唔擅跑窄場嘅馬，匆匆加入戰團，擺明係以吶喊助威身份列陣，果然「越駿寶」順利以大熱門勝出。
今次日賽，「佳運來」終可以返沙田露一手，田草千四米最合腳法性能。另一方面，四班有場千六米，李易達就雙龍出海，分別是「有衝勁」及「永高」，前者季內已兩勝，有越戰越勇之勢，本來依然會用楊明綸跑，但因騎者手傷關係，呢次將會改用梁家俊跑，至於「永高」馬房突然搵到蘇兆輝出馬，本來都唔會留意佢，但一用呢個配搭，就不其然會諗起「永高」一定唔會要蘇兆輝白騎一趟。點解咁講，先講報名，「有衝勁」用第一選擇權，「永高」是第二選擇馬，呢個部署，好多人會有個錯覺，認為「有衝勁」會是出擊主力，但大家再睇一睇，列後備二隻「火天大有」，乃馬房申請轉組當第二後備，咁即係講，呢場馬基本上唔係爆棚場合，用唔用第一選擇權報名，「永高」都有近乎十拿九穩嘅參賽資格。但「永高」用第二志願報名，大家就會覺得隻馬未必會係馬房主力，不過搵蘇兆輝跑，唔預早卜定，佢未必會睬你。大家又可睇睇「永高」上場跑千四米，最後十分鐘由九倍跌到六倍跑。結果殺入季軍，幕後呢一注飛，相信都輸唔少，今次「永高」棄千四，專登跑長二百米，用蘇兆輝披甲，應該係想本利歸還。