兩父子同日贏馬，呢個都可以講係一時佳話，大家仲記唔記得「奪冠」首捷，鞍上人是莫雷拉，而馬主係鍾建書，同日之中，蔡約翰有隻「爭分奪秒」贏馬，呢隻馬嘅馬主係鍾韙，原來與前者屬父子關係，後駒贏馬騎者亦係莫雷拉，兩父子建功嘅騎師屬同一人，可見莫雷拉幾咁勁。賀賢好多謝「奪冠」馬主，因為冇俾壓力佢，隻馬幾時贏就幾時贏，好似今次咁，唔跑贏馬路程千四米，改向千六米進軍，呢個決定完全係練馬師部署，佢唔會作任何決策上影響，其實，呢個倉又點止得一個咁好嘅馬主，好似「津津樂道」馬主咁，一樣咁好耐性，隻馬由大摩拉入賀廄，最初兩季，每季贏兩場，上季只贏得一場，但今季到目前為止，一場都未贏過，而且評分越跑越低，呢次仲跑五班賽，隻馬依然任由賀賢去部署，呢次請來雷神操刀，擺明車馬要搏，大家屆時都唔使擔心「津津樂道」會跑唔出水準。講真以呢隻馬質素及實力，季內仲係四班同「踏雪無痕」串Q，嗰場只係輸唔夠一個馬位，第三名係「駿馬翹楚」，後者季內可以喺四班贏馬，大家由此推測「津津樂道」目前嘅實力，經已係一隻四班尾五班頂馬。當然大家會睇佢近績跑泥地千八米大敗十二個馬位，但大家可以再睇番佢之前三次跑泥地嘅賽績，全無威脅性可言，所以呢場大敗，純粹求減分落班，希望可以配合到跑呢場五班千四米，賀賢咁有心思安排隻馬跑番贏馬路程，大家又點可以唔捧佢場。