■Twins香港文匯報訊（記者 植植）Twins剛剛完成福州演唱會，兩人特別為新一次演出，打造了一條新大長裙上台，另外為了福州歌迷，更新排了一part國語的雜錦歌。
阿Sa謂冇諗過演唱會可以巡迴成兩年咁耐，「反應這麼好當然開心，今次到福州，監製話最好台上全部都要講普通話，怕歌迷聽不懂廣東話，但最後發覺，歌迷基本上每一首廣東歌都識唱，仲一直大合唱，連點唱環節都係點廣東歌，可能根本他們都聽得懂廣東話。」
阿嬌之前戒了魚，但今次到福州，一落機就已經有歌迷買了當地最有名的福州魚丸給她們，令她最後也忍不住破戒，她說：「我見阿Sa食到咁好味，最後我都忍不住了！破戒！吃第一啖感覺真的好幸福啊。」阿Sa就笑言說：「阿嬌晚餐一個人食了三大個魚丸，哈哈，一邊食仲一邊話，真係好耐冇食魚啦，真係好好味呀！好幸福呀，好搞笑。」
此外，阿Sa又說：「係機場走個陣，見到有部卡拉OK機係機場，迷你卡拉OK室，好得意好似電話亭咁，有幾格，我們咪入去八下囉，點咗首自己的歌《朋友仔》來唱，一路唱，個電腦一路會畀評分，我地兩個一直唱到完，個評分都係不俗不俗。然後我們見隔籬有個女仔又係點唱我們首《小酒窩》，不過佢就同電腦合唱，於是我一時興起，就走過去打開佢個門，say咗聲hi ，佢望住我呆咗，哈哈，我估佢發夢也想不到係卡拉OK唱緊Twins歌，然後會見到Twins，希望沒嚇親佢啦，如果佢見到這段新聞，我想同佢講，咁下次我們去重慶唱，你又記得來啦！」