香港文匯報訊（記者 梁靜儀）楊千嬅、余文樂（樂仔）和導演昨日到旺角出席本周四上映的電影《春嬌救志明》宣傳活動，眾人又與粉絲玩遊戲，樂仔更公主抱起玩遊戲勝出的女粉絲。
昨日千嬅腳踏7吋高踭鞋，全程企得比較拘謹，樂仔見狀即笑說：「係呀，佢好Elegant㗎，企喺度唔郁就得㗎啦。」之後又與導演一齊暗寸千嬅是「中女」。
其後大會安排三人拿住吹氣膠鎚敲落燈箱，寓意電影票房爆燈，導演就陰陰嘴笑說：「今日喺商場度扑嘢呀？」樂仔跟住向千嬅話：「扑嘢呀，無辦法啦春嬌，扑到爆呀。」千嬅即喝止兩人：「夠啦！」
事後三人受訪時繼續不停互寸對方，問到千嬅昨日打扮Elegant，但樂仔和彭導就不停講有味笑話，問到會否尷尬？千嬅表示已經麻木：「我現在臉皮厚過鞋底，耳仔麻木晒。」
提到被寸是「中女」，千嬅大方表示唔會嬲：「他朝君體也相同，唔會動搖到我的情商。」她又指之前在內地宣傳，他們用普通話說要陪她度過更年期，很優雅，但廣東話比較直接：「有幾多男人可以陪女人過更年期呀？所以係嬲唔落，仲有啲感動添。」
笑指見樂仔肚屙心爽
由上海返港的余文樂因食錯嘢肚屙，搞到腳軟，更被導演取笑說：「係咪食錯咗後生女、細路女呀？」樂仔全無反擊之力說：「隨便你哋講啦。」千嬅就說：「見到佢咁個心好爽，又好肉赤。」
三人今日就要飛北京做電影宣傳，千嬅說：「叫咗樂仔助手同佢睇急症，一陣我哋一齊送佢去Check Check啦。」樂仔就答：「一齊送？送殯呀？」