採、攝：植毅儀 ／服裝：Timberland／鞋：KennethCole／場地：ACrazy Cart Cafe
無綫懸疑劇《 心理追兇Mind Hunter》本周大結局，在劇中，楊明（Mat）飾演患有阿斯伯格綜合症的天才阿Day，為拍此劇，楊明入行至今捱足十八年，晉身成為被力捧小生之一。去年公開認愛與莊思明互生好感正式拍拖，楊明表示已有心理準備結婚。
楊明於劇中飾演的阿斯伯格症患者表現矚目，角色雖不懂得與人交際，但其實是電腦天才。為了這個角色，楊明找了很多真實案例去參考阿斯伯格症患者的生活舉動。去年拍攝一場電單車戲時，更發生意外，楊明傷及左腳膝蓋，傷口見骨，情況嚴重。
「阿斯伯格症患者類似輕度自閉，思維完全無問題，反而係一個天才。事前做足功課，在對白和眼神上都作出了調整。因為我唔想自己有啲嘢做多咗，令觀眾誤解咗呢個病，所以我都上網睇咗好多病者的病態。阿Day只是活在自己的世界，個腦轉數又快，所以講說話都比較快，望人的眼神亦唔會好凌厲。呢個劇令我另一個難忘之處是拍劇炒車入院，拍一場湯鎮業自殺戲，我騎電單車拯救他，之前試位多次都沒事，詎料正式拍攝時便發生意外，其實該段路好短，速度都好慢，但一側埋隻左腳膝頭就撞埋石壆，個人無整個跌低。監製都預了用替身，本身只是叫我補回幾個鏡頭，但我想做到最好，所以親身上陣。受傷後仍想繼續拍攝，自己唔覺痛，後來工作人員見到我條褲滲出血，剪爛牛仔褲先見到左膝蓋爆肉見骨。幸好照過X光骨應無大礙，但都休息了接近2個月。」
拍拖是光明正大的事
2013年，當時年過三十的楊明下定決心與拍拖三年的圈外女友 Joanna結婚，可惜搞婚禮期間，一對準新人一言不合吵大鑊，搞到婚都結唔成。其後，楊明因為拍處境劇《愛．回家》與莊思明撻着，之後一直感情發展穩定，不時在社交網孖公仔晒愛，早前慶祝拍拖一周年，兩人感情如膠似漆，楊明更視女方為結婚對象。
「之前我們拍處境劇大家都多咗見面、溝通，經過了解先一齊。其實一向都覺得思明係好女仔。思明是一個好純品的女生，大家相處好開心，思明是一不折不扣的女漢子。我知道部分人會覺得我們好『高調』拍拖，但在於我們來說，不是要成日在網上放閃，但拍拖是光明正大的事，而且現在社會好多負能量，我希望畀多一些正能量大家。至於結婚，我都唔細啦，都希望是呢一、兩年內的事，在心中是有這個計劃，成家立室都是開心事。」
望演消防員角色
自2015年，楊明曾先後於《收規華》、《刀下留人》等劇擔任男二，演技大獲讚賞，觀眾勁buy。拍劇去盡，難怪劇接劇，入行18年的他，更在四月初拍竣的新劇《抱佣情人》，首次孭飛擔正男主角。獲公司度身訂做角色，同女神級人馬高海寧做鬥氣情侶。
「其實每個角色都要畀心機做，男一可能場口比較多，但每個角色都有不同的難度，都係要出飲奶的力去做。近年比較多飾演正派角色，角色的發揮空間更大。做邪邪哋的角色差不多六、七年了，近幾年多謝公司幫我轉變到不同的形象，畀多啲機會我嘗試，忠直、『薯薯哋』，亦正亦邪都有，好好玩。拍《收規華》是我近年最滿意的角色，聽到街坊叫自己做劇中角色『沈一然』比起叫楊明更加開心。如果將來有機會，我好想做消防員角色，因為細過原先想考消防員，更已通過體能測試，可惜自己有散光，所以未能過關。後來睇到《烈火雄心》，有人就提議我做演員，咁就咩職業都可以做，咁就入咗TVB，可惜到現在，我都未試過做消防員角色！」